खेल, अभिनय र समाजसेवामा सक्रिय उमर खान (भिडियो)

उमर खान, एक बहुप्रतिभाशाली व्यक्तित्व, जसले टिकटकमा ९० को दशकका रोमान्टिक गीतहरूमा आफ्नो अभिनय कला प्रस्तुत गर्दै लाखौंको मन जितेका छन् । तेक्वान्डोमा ४३ स्वर्ण पदक विजेता उनी चितवनमा मदरसा विद्यालयका सञ्चालक हुन् ।

नेपाली फिल्म ‘होस्टेल ३’ मा भिलेनको भूमिकाबाट डेब्यू गरेका खानले आफ्नो कन्टेन्ट क्रिएसन, खेल र सामाजिक कार्यमार्फत समाजमा सकारात्मक प्रभाव पारिरहेका छन् । मेलिना पन्तसँगको उनको टिकटक जोडी दर्शकले निकै रुचाएका छन् ।

खेल, अभिनय र सामाजिक कार्यलाई सँगसँगै अघि बढाउँदै आफ्नो बेग्लै पहिचान बनाउने उनको यात्रा कसरी सुरु भयो ? उनको प्रेरणाको स्रोत के हो ?

उमर खानसँग गरिएको कुराकानी :

कन्टेन्ट क्रिएसन कहिलेदेखि सुरु गर्नुभयो ? विशेष गरी ९० को दशकका रोमान्टिक गीतहरूमा कन्टेन्ट बनाउने सोच कसरी आयो ?

मेरो कन्टेन्ट क्रिएसनको सुरुवात म्युजिकलीबाटै भएको थियो । जुन समयबाट यो प्लेटफर्म सुरु भयो, त्यतिबेलादेखि नै मैले यो काम थालें । सुरुमा दिनमा २०–२५ वटा भिडियो पनि अपलोड गर्थें । बिस्तारै यसलाई निरन्तरता दिँदै गएँ । अब ९० को दशकका गीतहरूको कुरा गर्दा, मलाई यो दशकका गीतहरूमा टिकटक किन मन पर्‍यो भने यदि मैले यसमा कन्टेन्ट बनाएँ भने पुरानो पुस्ताले पनि हेर्छन् र नयाँ पुस्ताले पनि ।

९० को दशकका हिरोहरूको कुरा गर्दा बलिउडमा मेरो फेभरेट एक्टर अक्षय कुमार हुन्, विशेष गरी उनको एक्सन सिक्वेन्सहरूका कारण साथै शाहरुख खानको रोमान्टिक फिल्म पनि मनपर्छ । कुमार शानु र उदित नारायणका गीतहरूले मलाई गहिरो प्रभाव पारेको छ । यसमा अभिनय गर्न मलाई निकै आनन्द आउँछ । यसै कारण म २५ वर्षको भए पनि मेरो साथीहरू सबै उमेर समूहका छन् । सबैले मेरो कन्टेन्ट मन पराउँछन् र हेर्छन्, जसले मलाई खुसी बनाउँछ ।

टिकटकमा तपाईं मेलिना पन्तसँगको जोडी निकै रुचाइएको छ । उहाँसँगको जोडी रिलमा मात्र हो कि रियलमा पनि ?

मेलिना पन्त मेरो विधार्थी हुन् र एकदम राम्रो मिल्ने साथी पनि । उनले मलाई हरेक ठाउँमा सपोर्ट गर्छिन् । उनी आफैं एक राम्रो खेलाडी हुन् । मलेसिया, दुबई, बंगलादेश र पाकिस्तानजस्ता देशहरूमा आफ्नो राष्ट्रको झन्डा फहराउन सफल छिन् । हाम्रो केमिस्ट्री एकदम राम्रो मिल्छ । मैले अन्य केटीहरूसँग पनि भिडियोहरू बनाएको छु, तर उनीसँग जस्तो अट्याचमेन्ट अन्यसँग आउँदैन ।

मेलिना पन्तसँगको सम्बन्धबारे दर्शकहरूबाट प्रश्नहरू आउँछन् होला, उहाँ तपाईंको प्रेमिका हो ?

दर्शकहरूले हाम्रो जोडीलाई धेरै रुचाएका छन् । हामी राम्रो साथी हौँ । मेरो मनमा अरू कोही छैन र उनको मनमा पनि छैन जस्तो लाग्छ । हामीले एक-अर्कालाई प्रपोज गरेका छैनौं, तर समयले के गर्छ थाहा छैन । दर्शकहरूको मायाले हामीमा छुट्टै बन्धन छ । एक हुनुपर्छ जस्तो लाग्छ ।

पछिल्लो समय तपाईंले फिल्ममा पनि देखिनु भयो कि होइन ?

‘होस्टेल ३’ मेरो डेब्यु फिल्म हो । मेरा साना–साना क्लिपहरू निर्देशकको नजरमा पर्‍यो र उहाँले मन पराउनुभयो । निर्देशक शशांक कडेल र लेखक माधव शर्माले मलाई यो अवसर दिनुभयो उहाँहरूलाई धेरै–धेरै धन्यवाद दिन चाहन्छु ।

‘होस्टेल ३’ मा मलाई भिलेनको भूमिका दिइएको थियो । सुरुमा स्क्रिप्ट सुन्दा मलाई अचम्म लाग्यो किनकि निर्देशकहरूले मेरो रोमान्टिक भिडियोहरू मन पराउनुहुन्थ्यो र मलाई हिरो टाइपको देख्नुहुन्थ्यो । तर मलाई भिलेनको भूमिका दिनुभयो ।

सुरुमा भिलेनको रोल आउँदा ‘हिरो मात्र गर्छु’ भन्ने सोच आएको थियो, तर पछि लाग्यो कि कलाकार भएपछि इमानदारिता, धैर्य र हौसला चाहिन्छ । सफलता–असफलताले फरक पार्दैन, सबै प्रकारका क्यारेक्टर प्ले गर्न सक्नुपर्छ भन्ने लाग्यो । ‘होस्टेल’ ब्रान्ड नै हो र यसमा रोमान्स, कमेडीका साथै अभिनयको गहिराइ देखाउने अवसर थियो ।

मैले यसलाई स्वीकारें, मेहनत गरें र दर्शकहरूले पहिलो फिल्म नै धेरै मन पराइदिनुभयो । अहिले दर्शकहरू मेरो अर्को राम्रो कामको प्रतीक्षामा छन् । अहिले मैले दुई–तीन वटा फिल्म साइन गरेको छु र अरु प्रभावकारी भूमिकाहरूमा काम गर्दैछु।

तपाईं विशेष गरी शाहरुख खानको गीतमा धेरै भिडियो बनाउनुहुन्छ किन ?

शाहरुख खानको फ्यान त संसारभर छन् । उहाँको अभिनय मात्र होइन, व्यवहार र काम गर्ने तरिका पनि मनपर्छ । मेरो सपना नेपाली इन्डस्ट्रीको शाहरुख खान बन्ने हो । त्यसैले उहाँको फिल्मको गीतमा धेरै टिकटक बनाउने गर्छु ।

तपाईं तेक्वान्डो खेलाडी र प्रशिक्षक पनि हुनुहुन्छ , यो यात्रा चाँहि कहिलेदेखि सुरु भयो ?

म तेक्वान्डोमा लाग्नुको कारण मेरो बाबा हुनुहुन्छ । जो सेभेन डान, ब्ल्याक बेल्ट र नेपालका ग्रान्ड मास्टर हुनुहुन्छ । उहाँकै प्रभावले मैले पाँच वर्षको उमेरदेखि नै खेल्न सुरु गरें । आज म फोर डान ब्ल्याक बेल्ट छु र केही महिनामा फाइभ डानको परीक्षा दिन्छु । म प्रशिक्षक र अन्तर्राष्ट्रिय रेफ्री पनि बनेको छु । अन्तर्राष्ट्रिय स्तरमा ४३ वटा स्वर्ण पदक जितेर राष्ट्रलाई योगदान दिएको छु ।

प्रशिक्षकको रूपमा चितवन ताइक्वान्डो क्लब सञ्चालन गर्दैछु । चितवनमा ६५ वटा डोजाङ दर्ता छन् र हाम्रो क्लबबाट हरेक वर्ष एसियन गेम्स, साफ गेम्सका लागि टिमहरू पठाउँछौं । हामीले विशेष तेक्वान्डो खेलाडीहरूका लागि होस्टेल पनि सञ्चालन गरेका छौं । अहिले पाकिस्तानमा हुने साफ गेम्सका लागि खेलाडीहरूलाई तयारी गराइरहेका छौं ।

चितवनमा सामाजिक अभियन्ताको रूपमा पनि सक्रिय हुनुहुन्छ, तपाईंले सञ्चालन गर्नुभएको मदरसाका बारेमा पनि बताइदिनुहोस् न ।

मदरसा २०१४ देखि सञ्चालनमा आएकोहो । टिकटकलाई धेरैले राम्रो–नराम्रो तरिकाले प्रयोग गर्छन्, तर मैले यसलाई सकारात्मक रूपमा प्रयोग गरेर मानिसहरूबाट विश्वास जितें । यसैले मदरसा निर्माण गर्न सफल भएँ । मेरो सोच थियो-धार्मिक विद्यालयमार्फत राष्ट्रको नेतृत्व गर्ने खेलाडीहरू तयार गर्नु । यसमा मुस्लिम मात्र नभई हिन्दुहरूबाट पनि सहयोग मिल्यो । विदेश र नेपालबाट सबैले सपोर्ट गरेका छन् ।

विद्यालयमा पहिलो प्राथमिकता पढाइ नै हो । नेपाली, अंग्रेजी र कुरान शरिफ पढाइन्छ । नगरपालिकाबाट स्वीकृति लिएर कक्षा ७ सम्म सञ्चालन गरेका छौं । खेलमा तेक्वान्डोलाई मुख्य फोकस गरेका छौं, दुई समय ट्रेनिङ हुन्छ । तेक्वान्डो कोरियाबाट सुरु भएको खेल हो त्यसैले हामीले कोरियाबाट प्रशिक्षकहरू ल्याएर ट्रेनिङ दिन्छौं ।

यो खेलले नेपाललाई धेरै मेडल दिलाएको छ, जस्तै पलिसा गोवर्धनले ओलम्पिकमा कांस्य पदक जितेकी थिइन् । यो डिसिप्लिन सिकाउने खेल हो, सबैलाई यसमा जोडिन सुझाव दिन्छु । मुस्लिम नभए पनि जो कोही जोइन हुन सक्छन् । अहिले पनि काठमाडौंमा नेशनल च्याम्पियनसिपका लागि चितवनबाट ३० जना खेलाडी आएका छन् ।

टिकटकले तपाईंको अभिनय र तेक्वान्डो दुवैमा कसरी मद्दत गरेको छ ?

टिकटकबाट मेरो अभिनय यात्रा सुरु भयो । तेक्वान्डोले मलाई हाइलाइट गर्‍यो, तर सोसल मिडियाले यसलाई प्रदर्शन गर्ने प्लेटफर्म दियो । यसले विदेशमा पनि सहयोग मिल्छ, खेलको सिलसिलामा विदेश जाँदा विदेशमा बस्ने नेपालीहरूले खान बस्नदेखि लिएर अन्य कुरामा पनि सहयोग गर्नुहुन्छ ।

खेल र अभिनय दुवैमा देशलाई चिनाउने सपना छ । सोसल मिडियालाई सकारात्मक रूपमा प्रयोग गर्दा राम्रो प्रतिफल मिल्छ । मैले यसबाट धेरै कुरा पाएको छु । धेरैले सोसल मिडियालाई कन्ट्रोभर्सी गर्ने ठाउँको रूपमा लिनुहुन्छ । तर, मेरा लागि यो अवसर भएको छ ।

खेल, अभिनय र सामाजिक कार्य यी तीन कुराहरू नै मेरो जीवनका महत्वपूर्ण पक्ष हुन् । यिनलाई पूर्णरूपमा सँगै लिएर गएँ भने संसार जित्न सक्छु जस्तो लाग्छ ।