एमाले सांसद साह भन्छन् : गृहमन्त्री बनाइदिए नायक फिल्मको हिरोले झैँ काम गर्छु

१३ भदौ, काठमाडौं। नेकपा एमालेका सांसद किरण कुमार साहले सुशासन र स्थिरताको नारा लगाउने नेताहरूको व्यवहार त्यसअनुसारको पाउन नसकेको बताएका छन् ।

शुक्रबार प्रतिनिधि सभाको बैठकमा बोल्दै उनले भने, ‘सुशासनको नारा लगाउनेहरूको पालामा आज देश कुशासन र अपराधको दलदलमा डुबिरहेको छ ।’

रौतहटमा केवल २५ दिनमा ५ जना निर्दोष नागरिकले ज्यान गुमाउनु परेको उनले बताए । कसैको शव सुटकेसभित्र फेला परेको, कसैको जंगलमा शव फेला परेको, कसैको चच्कु प्रहरबाट हत्या भएको त कसैले आत्म हत्या गर्नेक्रम रहेको भनेर उनले गृहमन्त्री रमेश लेखकमाथि प्रश्न उठाए ।

गाउँ शहरमा त्रास रहेको उल्लेख गर्दै उनले सरकारले शान्ति सुरक्षाको प्रत्याभुति गर्न नसकेको उनले बताए ।

‘यो सब गृहमन्त्रीको कमजोरी र लापरबाहीको परिणाम हो’ उनले भने । यदि गृहमन्त्री रमेश लेखकसँग गृहमन्त्रालय चलाउने क्षमता छैन भने आफूलाई जिम्मेवारी दिन उनले माग गरे ।

‘यदि गृहमन्त्रीज्यूसँग गृहमन्त्रालय चलाउने क्षमता छैन भने यो मन्त्रालय मलाई एक महिनाको लागि दिनुहोस् । म देखाउँछु, सुशासन भनेको के हो ? संविधान कार्यान्वयन भनेको के हो ? कानुनको शासन भनेको कस्तो हुन्छ ?’

गृहमन्त्री भए यी काम आफूले नायक फ्लिमको हिरोले झैँ गर्ने उनको दाबी छ । ‘मैले यस्तो भनिराख्दा हास्यास्पद हुन सक्छ’ उनले गृहमन्त्रालयको नेतृत्व माग्दै भने, ‘यदि नायक फिल्मको जस्तै सफल हुन सकिन भने म यही सदनको बीचमा राजीनामा दिनेछु ।’

आफू गृहमन्त्री भएको खण्डमा हत्यारा जसको भए पनि, अपराध जुन शक्तिसँग जोडिएको भएपनि कुनै हालतमा उन्मिुक्ति नपाउने उनको प्रतिवद्धता छ ।

‘जनताको रगतसँग खेलवाड गर्ने खेल अब हाम सहन सक्दैनौं । अब यो सदनले निर्णय गर्नुपर्छ– जनताको ज्यान भन्दा ठूलो कुरा अरु हुन सक्दैन’ सांसद साहले भने, ‘जनताले कुरा होइन, परिणाम खोजिरहेको छ।’