आर्थिक स्थिति अस्थिर हुँदा लगानी जोखिम बढ्यो : उद्योगमन्त्री भण्डारी

१३ भदौ, काठमाडौं । उद्योग, वाणिज्य तथा आपूर्तिमन्त्री दामोदर भण्डारीले नेपालका उद्योग–व्यवसायले अहिले अनेकौं चुनौती सामना गरिरहेको बताएका छन् ।

नेपाल इँटा उद्योग महासंघको १७औं साधारणसभा तथा छैटौं राष्ट्रिय महाधिवेशनमा मन्त्री भण्डारीले आर्थिक स्थिति अस्थिर हुँदा लगानीमा जोखिम बढेको र त्यसको समाधान छलफल तथा बहस मार्फत खोज्नुपर्ने आवश्यकता औँल्याए ।

उनका अनुसार जलवायु परिवर्तन थप चुनौतीका रूपमा देखिएको छ, जसका कारण उद्योगीहरूले उत्पादनमा अवरोध भोगिरहेका छन् । यस्तो परिस्थितिमा गुणस्तर कायम राख्दै वातावरणमैत्री प्रविधि प्रयोग गर्नु अपरिहार्य रहेको उनको भनाइ छ ।

नेपाल–चीनबीच व्यापार र औद्योगिक सहकार्य महत्त्वपूर्ण बन्दै गएको उल्लेख गर्दै मन्त्री भण्डारीले उद्योगहरूले गुणस्तरको प्रमाणपत्र प्राप्त गरी अन्तर्राष्ट्रिय बजारमा प्रतिस्पर्धा गर्नुपर्ने आवश्यकता औँल्याए ।

मन्त्री भण्डारीले उद्योगी–व्यवसायीलाई कानुन पालना गर्दै वातावरणमैत्री ढंगले उद्योग सञ्चालन गर्न प्रेरित गर्नुपर्नेमा जोड दिए । कानुन विपरीत क्रियाकलाप सञ्चालन गर्ने उद्योगीको अनुमतिपत्र खारेज गर्ने बताउँदै उनले मापदण्ड विपरीत सञ्चालन भइरहेका उद्योगका कारण वातावरणमा परेको नकारात्मक असरलाई सरकारले अब हेरेर नबस्ने स्पष्ट पारे ।

‘यदि उद्योगी–व्यवसायीले नियम पालना गरेन भने वातावरणीय समस्या उत्पन्न हुन्छ र वातावरण, खेतीपाती तथा उत्पादनलाई हानि पुर्‍याउँछ,’ मन्त्री भण्डारीले भने, ‘त्यसैले सरकारले कडाइसाथ अनुगमन गरी समस्या समाधान गर्नेछ ।’

उद्योगीहरूले भोगिरहेको आर्थिक मन्दीको अवस्थालाई सरकार बुझेको र त्यसमा आवश्यक सहुलियत प्रदान गर्न छलफल तथा समन्वय गर्न तयार रहेको मन्त्री भण्डारीले बताए । उद्योगीका समस्या, मुनाफामा देखिएको संकट लगायत विषयमा सरकार गम्भीर रहेको उनको भनाइ छ ।

इँटा उद्योग प्राथमिकतामा राख्नुपर्ने भन्दै मन्त्री भण्डारीले घर, भवन तथा निर्माणका सबै क्रियाकलाप इँटामै आधारित हुने भएकाले इँटा व्यवसायीको साथमै सरकार रहेको उल्लेख गरे । उद्योगहरू प्रविधियुक्त, गुणस्तरीय र जलवायु परिवर्तनको असर कम गर्ने ढंगबाट सञ्चालन हुनुपर्नेमा उनले जोड दिए ।

महासंघ अध्यक्ष शंकरबहादुर चन्दले मन्त्री भण्डारीलाई उद्योगीमैत्री नेता भन्दै प्रशंसा गरे । उनले उद्योगीका माग सहजै सुन्ने, सम्बोधन गर्ने र प्रमुख समस्या समाधान गर्ने मन्त्री भण्डारीको भूमिकाप्रति आभार प्रकट गरे ।