मनहरीमा ५२ प्रकारका सङ्क्रमण रोग निगरानी प्रणाली लागू गरिँदै

१३ भदौ, हेटौंडा । मकवानपुरको पश्चिमी क्षेत्रस्थित मनहरी गाउँपालिकामा सङ्क्रमण रोगहरुको सुक्ष्म निगरानी प्रणाली लागू गरिने भएको छ ।

इपिडिमियोलोजी तथा रोग नियन्त्रण महाशाखा र युनिसेफसँगको साझेदारीमा पब्लिक हेल्थ रिसर्च एण्ड डेभलपमेन्ट सेन्टरमार्फत गाउँपालिकाभित्र ५२ प्रकारका सङ्क्रमण रोगहरूको सुक्ष्म निगरानी गरिने गाउँपालिका अध्यक्ष रञ्जन कालाखेतीले जानकारी दिए ।

नेपाल सरकारले तोकेको ५२ प्रकारको महामारीजन्य संक्रामक रोगको लक्षण देखिएमा तत्काल रिपोर्ट गर्ने र त्यसको समाधान गरिहाल्ने उद्देश्यले यो कार्यक्रम सञ्चालन हुन लागेको जनाइएको छ ।

शुक्रबार पब्लिक हेल्थ रिसर्च एण्ड डेभलपमेन्ट सेन्टरका कार्यक्रम अधिकृत सुवास लामिछानेले गाउँपालिका अध्यक्ष रन्जन कालाखेतीलाई कार्यक्रम सञ्चालन बारेको जानकारी पत्र हस्तान्तरण गरेका छन् ।

साथै कार्यक्रम सञ्चालनको लागि आवश्यक तथ्यांक उपलब्ध गराउनुका साथै अन्य सहयोग गर्न पनि लामिछानेले गाउँपालिकालाई अनुरोध गरे ।

रोग नियन्त्रण महाशाखाले विभिन्न सूचक तयार गरी पहिलो चरणमा देशभरका ४४ वटा स्थानीय तहमा यो कार्यक्रम सञ्चालन गर्न लागेको छ ।

मकवानपुर जिल्लामा हेटौँडा उपमहानगरपालिका र मनहरी गाउँपालिकामा यो कार्यक्रम लागु हुनेछ भने बागमती प्रदेशमा ८ वटा स्थानीय तह समेटिएको कार्यक्रम अधिकृत लामिछानेले बताए ।

पालिकामा यस कार्यक्रम कार्यान्वयनको लागि प्रत्येक वडामा २५ जनाको इपिडेमिक इन्टिलिजेन्स भोलेन्टियर टिम गठन हुने लामिछाने बताउँछन् । महिला स्वास्थ्य स्वयंमसेविका, शिक्षक, नीजि फार्मेसी सञ्चालक, जनप्रतिनिधिसहितको टिमलाई आवश्यक तालिम प्रदान गरी रोग निरीक्षणमा लगाइने जनाईएको छ ।