सीडेनको चुनाव भोलि, झा र केसी प्यानल बनाएर प्रतिस्पर्धामा

७ भदौ, काठमाडौं । नेपाली कांग्रेसको शुभेच्छुक संस्था ‘सेन्टर फर डेमोक्रेटिक इन्जिनियर्स’ (सीडेन) को आठौँ कार्यसमितिका लागि भोलि शनिबार निर्वाचन हुँदैछ ।

निर्वाचनका लागि दुई समूह प्यानल नै बनाएर मैदानमा उत्रिएका छन् । सभापति शेरबहादुर देउवा पक्षबाट रविभुषण झाको नेतृत्वमा प्यानल बनाइएको छ ।

झाको प्यानललाई नेता प्रकाशमान सिंह समेत समर्थन रहेको छ । संस्थापन पक्षसँग प्रतिस्पर्धा गर्नका लागि पूर्वमहामन्त्री डा.शशांक कोइराला र नेता प्रदीप पौडेल पक्षका इन्जिनियरहरूले प्यानल बनाएका छन् ।

धनेन्द्र केसीलाई अध्यक्षको उम्मेदवार संस्थापनइतरले बनाएको छ । संस्थापन पक्षबाट अध्यक्षमा उठेका झा नेपाल ईन्जिनियर एशोसिएसनको पूर्व महासचिव हुन् । अर्को समूहबाट अध्यक्षका उम्मेदवार केसी सीडेनको पूर्व उपमहासचिव हुन्  ।

झा प्यानलबाट उपाध्यक्षमा मदन पुरी, महासचिवमा सुदर्शन शर्मा, उपमहासचिवमा खगेन्द्र अवस्थी, कोषाध्यक्षमा सुजित कोइरालाको उम्मेदवारी छ ।

यस्तै केसी प्यानलबाट भने उपाध्यक्षमा सागर शमशेर शाही, महासचिवमा भूपेन्द्र श्रेष्ठ, उपमहासचिवमा सन्तोष नेपाल, कोषाध्यक्षमा रस्मिता बन्जराले उम्मेदवारी दिएका छन् । प्यानलबाहेक महासचिव पदमा कुलराज खनाल पनि प्रतिस्पर्धामा छन् ।

१८ सदस्यीय केन्द्रीय कार्यसमितिका लागि ३७ जनाले उम्मेदवारी दिएका छन् । निर्वाचनबाट ५ जना पदाधिकारी र १३ जना सदस्य चुनिनेछन् । अहिलेसम्म अध्यक्षमा २ जना, महासचिवमा ३ जना, उपाध्यक्ष, कोषाध्यक्ष र उपमहासचिवमा २/२ जनाको उम्मेदवारी परेको छ ।  सदस्यतर्फ १३ पदका लागि २६ जनाले उम्मेदवारी दिएका छन् ।

प्रत्येक प्रदेशमा १५ सदस्यीय समिति रहनेछ, जसमा ५ जना पदाधिकारी र १० जना सदस्य रहने व्यवस्था छ ।

मधेश, कर्णाली र सुदूरपश्चिम प्रदेशका सबै पदाधिकारी निर्विरोध चयन भइसकेका छन् । केन्द्रीय निर्वाचन अधिकारी सञ्जय अधिकारी का अनुसार अन्य प्रदेशमा केही पदमा निर्विरोध र केही पदमा मतदान हुनेछ ।

निर्वाचन शनिबार बिहान ८ बजेबाट साँझ ६ बजे सम्म सञ्चालन हुनेछ । बागमती प्रदेशमा सबैभन्दा बढी ४,०९० सदस्य छन् भने देशभर ६,५४७ जना सदस्य छन् ।

सातै प्रदेशबाट मतदान गर्ने व्यवस्था गरिएको छ । १३ स्थानबाट मतदान गर्ने व्यवस्था सीडेनले जनाएको छ ।

कुल प्रतिनिधिबाट ५० प्रतिशत हारहारी मत खस्ने अपेक्षा गरिएको सीडेनमा आवद्ध नेताहरूले जानकारी गराएका छन् ।