‘आफैंले बनाएको पार्टीमा अटाउन नसकेपछि छोडें’

२९ भदौ, काठमाडौं । नागरिक उन्मुक्ति पार्टी (नाउपा)का संस्थापक रेशम चौधरीले पार्टी परित्याग गरेको घोषणा गरेका छन् । टीकापुर हत्याकाण्डको योजनाकारको रुपमा लामो समय जेल बसेका रेशमले जसपा परित्याग गरेर नागरिक उन्मुक्ति पार्टी गठन गरेका थिए ।

कानुनीरुपमा आफूले नेतृत्व गर्न नमिलेपछि रेशम संरक्षकको रुपमा बसेर श्रीमती रञ्जिताको अध्यक्षतामा निर्वाचन आयोगमा दल दर्ता भएको थियो । तर, सत्ताको झगडा र रेशम-रञ्जिताबीचमै विवाद हुन थालेपछि नाउपा संकटमा परेको थियो ।

जेनजी युवा आन्दोलनलाई नैतिक रुपमा समर्थन जनाएका रेशमले आन्दोलनको ल्याएको नयाँ राजनीतिक परिवर्तन लगत्तै ‘नागरिक उन्मुक्ति पार्टी, नेपाल’ नामको नयाँ पार्टी घोषणा गरेका हुन् । यसै सन्दर्भमा रेशमसँग अनलाइनखबरले गरेको संक्षिप्त कुराकानी-

तपाईंले पार्टी छोड्नु भएको हो ?

हो मैले नागरिक उन्मुक्ति पार्टी छोडेँ ।

पार्टी छोड्नु पर्ने कारण के हो ?

धेरै विवाद भयो । विचार धेरै स्थापित भएनन् । कहिल्यै केन्द्रीय समितिको बैठक पूर्णरुपमा नबस्ने, कहिले के नहुने, कहिले के नहुने । यो सबै विवादबाट टाढा हुन हो । हामीले जेनजीको आन्दोलनप्रति आंशिक समर्थन जनाएका थियौं । शान्तिपूर्ण राजीनामा दियौं । फेरि भोलिपल्ट राजीनामा थुतेर संसद स्थापनाको निर्णय गर्दिने । यसरी रहनुभन्दा इमानदारीपूर्वक बस्नु जाति ।

बलिदानको जगमा आफैंले स्थापना गरेको पार्टी छाड्दा कस्तो अनुभूति भइरहेको छ ?

एकदम दु:ख लागिराखेको छ । भन्दा पनि दु:ख लागिराखेको छ । तर, अटाउनै सकिएन । जसलाई स्थापना गरेँ २१ जनाबाट, तर मैले नै उनीहरुबाट लात्ती र जवाफ खानु परेको छ । कसैले भुत्ल्याएको छ । कसैले लुछेको छ । त्यसकारण रहिरहन उचित लागेन ।

अब तपाईंको बाटो के हुन्छ ?

राजनीतिक व्यक्ति भइसकेपछि यसबाट भाग्न मिल्दैन । म नयाँ राजनीतिक दलको निर्माण गर्छु ।

त्यो पार्टीको नाम के हुन्छ ?

म ‘नागरिक उन्मुक्ति पार्टी, नेपाल’ निर्माण गर्छु ।

यसमा कोको हुनुहुन्छ ?

अहिलेका लागि लगभग ७ जना जति डाक्टरहरु हुनुहुन्छ । १२-१५ जना इन्जिनियरहरु हुनुहुन्छ । त्यत्तिकै संख्यामा कानुनविदहरु हुनुहुन्छ । नाउपाका जनप्रतिनिधिहरु, नाउपाका संस्थाप केन्द्रीय सदस्यहरु पनि हुनुहुन्छ ।

अहिलेको पार्टीबाट कति जना हुनुहुन्छ ?

हुनुहुन्छ । फेरि अधिकांश आउनु पनि हुन्छ । जति जना आउन चाहानुहुन्छ, सबैलाई ढोका खुल्ला छ ।

पार्टी छोडेर नयाँ पार्टी गठन गर्नेबारे रञ्जिता श्रेष्ठसँग छलफल गर्नुभयो ?

रञ्जिताजीसँग छलफल केही भएको छैन । छलफल गरिरहन उचित ठानिनँ मैले ।

तपाईंहरुको दुई जनाको सम्बन्ध त कायमै छ नि ?

कानुनी रुपमा कायमै छ ।