पार्टीमा सिद्धान्तको बहस हुन सकेन : काफ्ले

१ कात्तिक, काठमाडौं । नेपाली कांग्रेसको केन्द्रीय कार्यसमितिमा आगामी महाधिवेशनको बहस चलिरहेका बेला केन्द्रीय सदस्य कुन्दनराज काफ्लेले सिद्धान्तको बहस हुन नसकेको टिप्पणी गरेका छन् ।

समाजिक सञ्जाल फेसबुकमा ‘वास्तविक नेतृत्वका निम्ति मेरो अपिल’ शीर्षक दिएर उनले शनिबार कांग्रेसमा सिद्धान्तको बहसभन्दा पनि व्यक्तिगत अहंकारले ठाउँ पाउँदा पार्टी कमज़ोर भएको उल्लेख गरेका छन् ।

बागमती प्रदेशका निवर्तमान अर्थमन्त्रीसमेत रहेका काफ्लले केन्द्रीय समिति बैठकमा पार्टीको पदमा पुग्ने महत्वाकांक्षी प्रयासमात्र भइरहेको आरोपसमेत लगाएका छन् ।

‘प्रजाान्त्रिक समाजवादी कार्यक्रम र सिद्धान्तको व्यवहारिक प्रयोगका बारेमा पार्टीभित्र अहिले बहस र छलफल हुन सकेको छैन,’ उनले लेखेका छन्, ‘केवल पदमा मात्र पुग्ने महत्वाकांक्षी प्रयासमात्र भइरहेका छन् ।’

कुनै पनि राजनीतिक पार्टीले आफ्ना घोषित सिद्धान्त र कार्यक्रमका बारेमा विचार, पुनर्विचार र समीक्षा गरिरहने र जनताको आस्था र विश्वासको अवस्था परीक्षण गर्ने उनको भनाइ छ ।

‘बीपी कोइरालाजस्तो सिद्धान्तवादी समाजवादी नेताको मार्गदर्शनमा अघि बढेको पार्टीको नैतिक हिम्मत सगरमाथा जत्तिकै अटल छ र हामीबाट जनाताको पक्षमा काम गर्दा कुनै कमजोरी गरेका छैनौँ भनेर ढुक्क साथ भन्न सक्ने नेतृत्व निर्माणको मेरो आवाज र अभियान हो,’ काफ्लले भनेका छन्, ‘ढाकछोप र लिपपोतबाट अघि बढ्न मिल्दैन र जनताको आँखामा छारो हालेर पानी माथिको ओभानो बन्न खोज्ने पदासीन र पदासीन माथि खुला विद्रोह गर्न साथीहरूमा आह्वान गर्दछु ।’