‘जेरी अन टप’ लाई स्पष्टीकरण सोध्ने र ‘कोशेढुंगा’ को प्रदर्शन रोक्ने सेन्सर बोर्डको निर्णय

काठमाडौं । प्रदर्शन नियम उल्लंघन गरेको पाइएको बताउँदै केन्द्रीय चलचित्र जाँच समिति (सेन्सर बोर्ड) ले फिल्म ‘कोशेढुंगा’ को प्रदर्शन रोक्ने निर्णय गरेको छ ।

मंगलबार बसेको समितिको बैठकले उक्त फिल्मको सार्वजनिक प्रदर्शन रोक्का गर्न चलचित्र विकास बोर्डमा लेखिपठाउने निर्णय गरेको छ ।

असोज २४ गते २४ घण्टाभित्र समितिमा स्पष्टीकरणको लिखित जवाफ पेश गर्न निर्देशन दिएपनि त्यसको पालना नभएको समितिको ठहर छ । सरोज पौडेल निर्देशित फिल्म हलमा भने प्रदर्शन भैसकेको छ ।

यसैबीच, अनुगमनको क्रममा प्रदर्शनको नियम पालना नगरेको पाइएको बताउँदै समितिले प्रदर्शनरत अनमोल केसी स्टारर फिल्म ‘जेरी अन टप’ लाई स्पष्टीकरण सोधेको छ ।

स्पष्टीकरणको पत्र निर्मातालाई आजै पठाइएको र निर्माताबाट चित्त बुझ्ने जवाफ नआए आफूहरू कानूनी प्रक्रियामा अघि बढ्ने समिति सदस्य सम्पन्न श्रेष्ठले बताए ।

६ बुँदासहित समितिले ‘जेरी अन टप’का निर्मातालाई स्पष्टीकरण सोध्दै पत्र लेखेको छ ।

अश्लिल लाग्ने संवाद म्युट नगरिएको, धुमपान-मद्यपान हानिकारक छ भन्ने सन्देश नराखिएको, तोङ्बा खाएको दृश्यमा पनि सन्देश नलेखिएको, सबै सन्देश अंग्रेजी भाषामा रहेको तर कार्यविधिअनुसार नेपाली भाषामा हुनुपर्ने समितिको ठहर छ ।

१७ कात्तिकमा सिटी सेन्टरको बिग मूभिज हलमा अनुगमन गर्दा उपरोक्त कुरा भेटिएको प्रतिवेदन अनुगमन समितिले समितिलाई पठाएको थियो । अनुगमन समितिको प्रतिवेदन र केन्द्रीय चलचित्र जाँच समितिको निर्णयको पत्र अनलाइनखबरलाई प्राप्त भएको छ ।