‘लोन लस प्रोभिजन’ बढ्दा नेपाल इन्भेस्टमेन्ट मेगा बैंकको नाफामा उच्च गिरावट

News Summary

Generated by OK AI. Editorially reviewed.

नेपाल इन्भेस्टमेन्ट बैंकको चालु आर्थिक वर्षको पहिलो त्रैमासिकमा खुद नाफा ९६.९२ प्रतिशत घटेर ४ करोड ५० लाख रुपैयाँ पुगेको छ।
लोन लस प्रोभिजन ९७ करोड ५१ लाखबाट २ अर्ब ८० करोड रुपैयाँ पुगेकोले बैंकको खुद नाफामा असर परेको छ।
कुल कर्जामा निष्क्रिय कर्जा ५.८२ प्रतिशतबाट ६.६३ प्रतिशत पुगेको छ र खुद ब्याज आम्दानी पनि घटेको छ।

२१ कात्तिक, काठमाडौं । नेपाल इन्भेस्टमेन्ट बैंकको खुद नाफा उच्च दरले घटेको छ ।

बैंकले सार्वजनिक गरेको चालु आर्थिक वर्षको पहिलो त्रैमासिक वित्तीय विवरणअनुसार यस अवधिमा खुद नाफा ९६.९२ प्रतिशत घटेको छ । चालु आर्थिक वर्षको तीन महिनामा बैंकको खुद नाफा ४ करोड ५० लाख रुपैयाँ छ ।

गत वर्षको यसै अवधिमा यस्तो नाफा १ अर्ब ४६ करोड रुपैयाँ थियो । नाफा घट्नुको मुख्यः कारण लोन लस प्रोभिजन (इम्पेरिमेन्ट चार्ज) बढ्नु हो । पहिले लोन लस प्रोभिजन रकम ९७ करोड ५१ लाख रुपैयाँ रहेकोमा अहिले २ अर्ब ८० करोड रुपैयाँ पुगेको छ । जसले गर्दा खुद नाफामा असर परेको हो ।

बैंकको खुद ब्याज आम्दानी पनि घटेको छ । यस्तो आम्दानी पहिले ३ अर्ब ८७ करोड रुपैयाँ रहेकोमा अहिले ३ अर्ब २४ करोड रुपैयाँ छ ।

बैंकको वार्षिक प्रतिसेयर आम्दानी ०.५३ रुपैयाँ छ । पहिले यस्तो आम्दानी १७.१६ रुपैयाँ थियो । प्रतिसेयर नेटपर्थ १९६ रुपैयाँ छ । निष्क्रिय कर्जा बढेको छ । कुल कर्जामा यस्तो कर्जा पहिले ५.८२ प्रतिशत रहेकोमा अहिले ६.६३ प्रतिशत छ ।

बैंकको वितरणयोग्य नाफा १ अर्ब १६ करोड रुपैयाँ (प्रतिसेयर ३.४३ रुपैयाँ) ऋणात्मक छ । बजार मूल्य प्रतिकित्ता २०४ रुपैयाँ छ । बैंकको आधार दर एक वर्षको अवधिमा ७.२८ बाट घटेर ५.६९ प्रतिशतमा झरेको छ ।