यूएईको नक्कली कलेजमा नेपाली विद्यार्थी पठाएको उजुरी, अनुसन्धान गर्दै सरकार

News Summary

Generated by OK AI. Editorially reviewed.

शिक्षा, विज्ञान तथा प्रविधि मन्त्री महावीर पुनले यूएईमा नक्कली कलेजमा नेपाली विद्यार्थी पठाइएको उजुरी आएको र अनुसन्धान भइरहेको बताएका छन्।
नेपालका केही कन्सल्टेन्सीहरूले यूएईको फ्री जोनमा इन्सटिच्युट दर्ता गरी विद्यार्थीहरू नक्कली कलेजमा पठाइरहेको उजुरी आएको छ।
परराष्ट्र मन्त्रालयले यूएईमा विद्यार्थीहरूले दु:ख पाइरहेको जानकारी दिएको र गहन छानबिन भइरहेको मन्त्री पुनले उल्लेख गरे।

२७ कात्तिक, काठमाडौं । संयुक्त अरब इमिरेट्स (युएई) मा नक्कली कलेजमा नेपाली विद्यार्थी पठाएकोबारे सरकारले अनुसन्धान थालेको छ ।

शिक्षा, विज्ञान तथा प्रविधि मन्त्री महावीर पुनले कन्सल्टेन्सीहरूले नक्कली कलेजमा विद्यार्थी पठाएको उजुरी आएको र थप अनुसन्धान भइरहेको बताए ।

‘यूएईमा पढ्न जाने विद्यार्थीहरु सावधान – नेपालका केहि कन्सल्टेन्सीहरुले यूएईको फ्री जोनमा इन्सटिच्युट दर्ता गरी नेपालबाट विभिन्न नक्कली कलेज पढ्न बिद्यार्थीहरु दिन दिनै पठाई रहेको कुराको उजुरी आएको छ । त्यस्ता विद्यार्थीहरूले यूएईमा दु:ख पाइरहेको कुराको जानकारी परराष्ट्र मन्त्रालयले दिएको छ । सो कुराको गहन छानबिन हुँदैछ । कोहि पनि नफस्नुहोला,’ मन्त्री पुनले सामाजिक सञ्जाल फेसबुकमा लेखेका छन् ।