रातामकैको अग्रसरतामा पुनःनिर्मित सातदोबाटो प्रहरी वृत्तको भवन हस्तान्तरण

News Summary

Generated by OK AI. Editorially reviewed.

हास्यकलाकार किरण केसीले स्थानीय समुदायको सहयोगमा सातदोबाटो प्रहरी वृत्तको नवनिर्मित भवन प्रहरीलाई हस्तान्तरण गरेका छन्।
प्रहरी महानिरीक्षक दानबहादुर कार्कीले सुरक्षा सबैभन्दा प्रमुख कुरा भएको र नागरिक सहयोग आवश्यक रहेको बताएका छन्।
मदनकृष्ण श्रेष्ठ र हरिवंश आचार्यले कलाकार केसीको सामाजिक कार्यको प्रशंसा गरेका छन्।

काठमाडौं । हाँस्यकलाकार किरण केसी ‘रातामकै’ को अग्रसरतामा पुनःनिर्माण गरिएको प्रहरी वृत्त सातदोबाटोको नवनिर्मित भवन प्रहरीलाई हस्तान्तरण गरिएको छ ।

२३ र २४ गतेको जेनजी प्रदर्शनको क्रममा उक्त भवन पूर्णरुपमा क्षतिग्रस्त भएको थियो । स्थानीय समुदायको आर्थिक र भौतिक सहयोगमा रातामकैले ३ रोपनी क्षेत्रफलमा फैलिएको भवन पुनःनिर्माण गरेका थिए ।

आइतबार बिहान आयोजित समारोहमा प्रहरी महानिरीक्षक दानबहादुर कार्की, हाँस्यकलाकारद्वय मदनकृष्ण श्रेष्ठ र हरिवंश आचार्य, उपत्यका प्रहरी कार्यालय रानीपोखरीका प्रमुख ईश्वर कार्कीको आतिथ्यतामा कलाकार केसीले समितिका सदस्यहरूको उपस्थितीमा भवन हस्तान्तरण गरे ।

जेनजी आन्दोलनअघिको वृत्तको भवन पनि कलाकार केसीले नै निर्माण गरेका थिए । भवन हस्तान्तरण कार्यक्रममा बोल्दै प्रहरी महानिरीक्षक कार्कीले सुरक्षा सबैभन्दा प्रमुख कुरा भएको बताए ।

सुरक्षा प्रदान गर्ने कार्यक्रममा नागरिकको सहयोग पनि आवश्यक रहेको जनाउँदै कार्कीले भवनको पुननिर्माणको लागि कलाकार केसी र स्थानीय समुदायलाई धन्यवाद दिए ।

महजोडीले पनि कलाकार केसीलाई यो सामाजिक कार्यको लागि धन्यवाद दिँदै कलाकारको दायित्व देश र समाजप्रति पनि हुनुपर्ने बताए । त्यो कुरालाई कलाकार केसीले पुष्टि गरेको उनीहरूले बताए ।

सो अवसरमा, पुननिर्माणमा सघाउने दाता र सहयोगीलाई सम्मान गरिएको थियो ।