खरायो प्रहरी र चलाख फ्याउरोबारेको फिल्म बन्यो विश्वभर धेरै कमाउने नवौं (टपटेन सूची)

एनिमेटेड फिल्म ’जुट्रोपोलिस २’ ले विश्वभर १.७ बिलियन डलर कमाउँदै हलिउड इतिहासकै सबैभन्दा धेरै कमाउने एनिमेटेड फिल्मको रेकर्ड बनाएको छ ।

केही देशमा ’जुटोपिया २’ नामले चिनिने यस फिल्मले सन् २०२४ मा रिलिज भएको ‘इनसाइड आउट २’ को रेकर्ड तोडेको हो । ‘इनसाइड आउट २’ ले १.६९ बिलियन डलर कमाएको थियो ।

यो फिल्म अहिले विश्वभरकै सबैभन्दा सफल फिल्मको सूचीमा नवौँ स्थानमा पुगेको छ । यो सूचीमा यसअघि नै ‘अवतार’, ‘टाइटानिक’, ‘एभेन्जर्सः एन्डगेम’ र ‘स्टार वार्स : द फोर्स अवेकन्स’ जस्ता चर्चित फिल्म छन् ।

हलिउडका लागि यो रेकर्ड भए पनि समग्र विश्वमा भने सबैभन्दा धेरै कमाउने एनिमेटेड फिल्मको रेकर्ड चीनको ‘ने झा २’ को नाममा छ । उक्त चिनियाँ फिल्मले गत वर्ष २.२ बिलियन डलर कमाएर विश्व कीर्तिमान कायम गरेको थियो ।

गत नोभेम्बरमा रिलिज भएको ‘जुट्रोपोलिस २’ सन् २०१६ मा आएको चर्चित फिल्म ‘जुट्रोपोलिस’ को सिक्वेल (दोस्रो भाग) हो । यो फिल्म बनाउन करिब १५ करोड डलर खर्च भएको अनुमान गरिएको छ ।

यस पटकको कथामा खरायो प्रहरी अधिकारी जुडी हप्स (जिन्निफर गुडविनको आवाज) र चलाख फ्याउरो निक वाइल्ड (जेसन ब्याटम्यानको आवाज) पुनः एकसाथ देखिएका छन् । उनीहरू सहरमा आएका एक रहस्यमयी नयाँ बासिन्दा, छेपारो प्रजातिका ग्यारी डी स्नेक (के हुई क्वानको आवाज) को खोजीमा लागेको रोचक यात्रा फिल्ममा देखाइएको छ ।

यो ऐतिहासिक सफलतापछि डिज्नी इन्टरटेनमेन्टका सह-अध्यक्ष एलन बर्गम्यानले एक विज्ञप्ति जारी गर्दै खुसी व्यक्त गरेका छन् । उनले भनेका छन्, ‘यो सफलताको मुख्य श्रेय विश्वभरका प्रशंसकलाई जान्छ, जसको उत्साहले गर्दा नै यो सम्भव भएको हो । हामी हाम्रा फिल्म निर्माताप्रति गर्व गर्छौं । ‘जुटोपिया २’ एक असाधारण उपलब्धि हो र यसलाई जीवन्त बनाउन सहयोग गर्ने सबैप्रति हामी आभारी छौँ ।’

’जुट्रोपोलिस २’ ले रिलिजको सुरुवाती दिनदेखि नै नयाँ रेकर्ड बनाउन सुरु गरेको थियो । अमेरिकाको ‘थ्यांक्सगिभिङ’ पर्वको अवसर पारेर रिलिज गरिएको यस फिल्मले कुनै पनि एनिमेटेड फिल्मले पाएको अहिलेसम्मकै ठुलो ‘ओपनिङ विकेन्ड’ (सुरुवाती साताको कमाइ) को रेकर्ड राखेको थियो ।

यो फिल्म विश्वभर १ बिलियन डलरको आँकडा सबैभन्दा छिटो पार गर्ने हलिउड एनिमेटेड फिल्म समेत बनेको छ ।

यद्यपि, चीनको फ्यान्टासी एडभेन्चर फिल्म ‘ने झा २’ अझै पनि कमाइको हिसाबले धेरै अगाडि छ । ‘ने झा २’ ले कमाएको २.२ बिलियन डलरको ठुलो हिस्सा चीनकै बजारबाट संकलन भएको हो ।

विश्वभर धेरै कमाउने १० फिल्म

१) अवतार- २.९२ बिलियन
२) एभेन्जर्स : एन्डगेम- २.७९ बिलियन
३) टाइटानिक- २.२६ बिलियन
४) अवतार : द वे अफ वाटर- २.२५ बिलियन
५) ने झा २- २.२१ बिलियन
६) स्टार वार्स : द फोर्स अवेकन्स- २.०७ बिलियन
७) एभेन्जर्स : इन्फिनिटी वार- २.०५ बिलियन
८) स्पाइडर-म्यान : नो वे होम- १.९२ बिलियन
९) जुटोपिया २- १.७० बिलियन
१०) इनसाइड आउट २- १.६९ बिलियन