एपस्टाइन प्रकरणमा नयाँ खुलासा, बिल गेट्स र एलन मस्कमाथि गम्भीर आरोप

१८ माघ, काठमाडौं । अमेरिकी न्याय विभागले हालै दिवंगत जेफ्री एपस्टाइनसँग सम्बन्धित केही नयाँ दस्तावेजहरू सार्वजनिक गरेको छ, जसमा विश्वका चर्चित अर्बपतिहरू बिल गेट्स र एलन मस्कको नाम जोडिएको छ।

यद्यपि, यी आरोपहरू एपस्टाइनले आफैंलाई लेखेका ड्राफ्ट इमेलमा आधारित भएकाले यिनको आधिकारिकता पुष्टि हुन भने सकेको छैन ।

एपस्टाइनले सन् २०१३ मा लेखेका इमेलहरूमा गेट्सले ‘रसियन युवतीहरू’ मार्फत यौन रोग सारेको र त्यसको उपचारका लागि लुकीछिपी एन्टिबायोटिक्स मागेको दाबी गरिएको छ। गेट्सका प्रवक्ताले यी दाबीहरूलाई ‘पूर्णतया झुटो र अर्थहीन’ भन्दै खण्डन गरेका छन्।

दस्तावेजहरूमा टेस्लाका सीईओ एलन मस्क र एपस्टाइनबीच सन् २०१२ र २०१३ मा भएका कुराकानी पनि सामेल छन्। जसमा मस्कले एपस्टाइनको निजी टापुमा हुने भव्य पार्टीको समयबारे सोधपुछ गरेको देखिन्छ।

कानुनी विज्ञहरूका अनुसार एपस्टाइनले यी इमेलहरू आफ्नो प्रभाव देखाउन वा कसैलाई ब्ल्याकमेल गर्नका लागि बढाइचढाइ गरी लेखेको हुनसक्छ।

जेफ्री एपस्टाइनको सन् २०१९ मा जेलमै मृत्यु भएको थियो। उनीमाथि नाबालिगहरूको यौन तस्करी गरेको गम्भीर आरोप लागेको थियो। अहिले सार्वजनिक भएका यी ३० लाखभन्दा बढी कागजातहरू सोही अनुसन्धानको हिस्सा हुन्।