बादललाई बधाई दिँदै सुहाङले भने- मेरो उम्मेदवारी विद्रोह होइन, आन्दोलनप्रतिको कर्तव्य हो

१८ चैत, काठमाडौं । नेकपा एमालेका युवा नेता सुहाङ नेम्वाङले संसदीय दलमा आफ्नो उम्मेदवारीलाई विद्रोहका रुपमा नबुझ्न नेताहरूसँग आग्रह गरेका छन् ।

रामबहादुर थापा संसदीय दलको नेता निर्वाचित भएपछि बधाई मन्तव्य राख्दै सुहाङले अग्रज नेताहरूप्रतिको सदैव सम्मान रहने बताएका थिए ।

‘मलाई मेरो पार्टीको गौरवशाली मूल्य, मान्यता र परम्पराको पूर्ण बोध छ । अग्रज नेताहरूप्रति मेरो सदैव उच्च सम्मान छ,’ नेम्वाङले भनेका थिए, ‘यहाँ स्पष्ट पार्न चाहन्छु, मेरो उम्मेदवारी कुनै विद्रोह होइन । यो त समयको माग र आन्दोलनप्रतिको मेरो कर्तव्यबोध हो । पार्टी र आन्दोलनप्रतिको मेरो दायित्व पनि हो ।’

अहिले पार्टीभित्र युवा पुस्तामा छाएको निराशा चिर्न र आन्दोलनलाई पुनजीर्वित गर्न पनि आफ्नो उम्मेदवारी आवश्यक रहेको उनको तर्क थियो ।

‘अग्रजहरूको योगदानको म सधैं कदर गर्छु । तर पार्टीभित्रको यो निराशा र हतासालाई अन्त्य गर्न मैले विष पिएर भएपनि यो आँट गर्नु परेको हो,’  सुहाङको भनाइ उद्धृत गर्दै एक सांसदले भने ।

अग्रजहरू हुँदाहुँदै दलको नेतामा उम्मेदवारी दिएर पार्टीको मूल्य, मान्यता र परम्परा बिर्सेको रुपमा नबुझ्न पनि उनको आग्रह थियो ।

‘मैले पार्टीको अभ्यास, मूल्य र मान्यतालाई राम्ररी बुझेको छु । ती मूल्य, मान्यता र अभ्यासप्रति गहिरो सम्मान छ,’ सुहाङले भनेका थिए, ‘तर मूल कुरा पार्टीको भविष्य हो । आन्दोलनको भविष्य पनि हो । त्यसैको निम्ति मेरो यो प्रयास हो ।’