गुगलको ‘जेम्मा ४ ‘ सार्वजनिक, अब सबैका लागि पूर्ण रूपमा ‘ओपन सोर्स’

गुगलले आफ्नो सबैभन्दा नयाँ र शक्तिशाली आर्टिफिसियल इन्टेलिजेन्स मोडेल ‘जेम्मा ४’ सार्वजनिक गरेको छ। यसपटक गुगलले ठूलो फड्को मार्दै यस मोडेललाई केवल ‘ओपन वेट’ मात्र नभई पूर्ण रूपमा ‘ओपन सोर्स’ (अपाचे २. ० लाइसेन्स अन्तर्गत) बनाएको छ।

संसारभरका डेभलपर र प्रयोगकर्ताहरूले जेम्मा ४ लाई निःशुल्क डाउनलोड गर्न, परिमार्जन गर्न र व्यावसायिक प्रयोजनका लागि कुनै रोयल्टी नतिरी प्रयोग गर्न सक्ने छन्।

जेमिनाई र जेम्मामा के फरक छ?

जेमिनाई : यो गुगलको सःशुल्क र क्लोज्ड प्रविधि हो, जुन गुगलका उत्पादनहरू (सर्च, जिमेल, डक्स ) मा एकीकृत छ। यसका लागि इन्टरनेट र गुगलको सर्भर आवश्यक पर्दछ।

जेम्मा ४: यो ओपन मोडेल हो, जसलाई प्रयोगकर्ताले आफ्नै डिभाइस (ल्यापटप वा एन्ड्रोइड फोन) मा डाउनलोड गरेर बिना इन्टरनेट पनि चलाउन सक्छन्। यसले प्रयोगकर्ताको डाटा पूर्ण रूपमा निजी र सुरक्षित राख्न मद्दत गर्दछ।

जेम्मा ४ का मुख्य विशेषताहरू:

उच्च क्षमता : यसमा एडभान्स्ड रिजनसङ, मल्टी-स्टेप प्लानिङ र गणितीय समस्या समाधान गर्ने विशेष क्षमता छ।

मल्टिमोडल : यसले अडियो र भिडियो प्रोसेस गर्न, ध्वनि पहिचान गर्न र चार्टहरू विश्लेषण गर्न समेत सक्छ।

विभिन्न आकारमा उपलब्ध : प्रयोगकर्ताको डिभाइसको क्षमता अनुसार यो २ अर्ब, ४ अर्ब, २६ अर्ब र ३१ अर्ब प्यारामिटर भएका चारवटा आकारमा उपलब्ध छ।

भाषा र सन्दर्भ : यसले १४० भन्दा बढी भाषाहरू सपोर्ट गर्छ र यसको ‘कन्टेक्स्ट विन्डो’ २ लाख ५६ हजार टोकनसम्म छ।

विकासकर्ताका लागि नयाँ अवसर

गुगलका अनुसार जेम्मा ४ लाई अरबौँ एन्ड्रोइड डिभाइस र सामान्य ल्यापटपका जीपीयूहरूमा सहजै चलाउन सकिन्छ। अपाचे २.० लाइसेन्सले गर्दा अब कम्पनीहरूले आफ्नै डाटा र पूर्वाधारमा पूर्ण नियन्त्रण कायम राख्दै एआई एजेन्टहरू र कोडिङ असिस्टेन्टहरू निर्माण गर्न सक्ने छन्।