नक्कली फेसबुक आईडीबाट अश्लील सामग्री फैलाउने युवक पक्राउ

News Summary

Generated by OK AI. Editorially reviewed.

स्याङ्जा प्रहरीले सामाजिक सञ्जालमार्फत महिलामाथि दुर्व्यवहार गरेको आरोपमा ३२ वर्षीय सुजन खाँण ठकुरीलाई नियन्त्रणमा लिएको छ।
ठकुरीले नक्कली फेसबुक खाता प्रयोग गरी अश्लील भिडियो बनाएर पीडित महिलाका आफन्तलाई पठाउने र धम्की दिने कार्यमा संलग्न रहेको आरोप छ।
सामाजिक सञ्जालको दुरुपयोग गरी कसैको मानहानि वा मानसिक यातना दिने कार्य नगर्न प्रहरीले सर्वसाधारणलाई सचेत रहन आग्रह गरेको छ।

२१ चैत, स्याङ्जा । सामाजिक सञ्जालमार्फत अश्लील सामग्री बनाएर महिलामाथि दुर्व्यवहार गरेको आरोपमा प्रहरीले एक जनालाई नियन्त्रणमा लिएको छ ।

नक्कली फेसबुक खाता प्रयोग गरी अश्लील भिडियो तयार पार्ने, ती सामग्री इन्टरनेटमार्फत पीडित महिलाका आफन्तहरूलाई पठाउने तथा गालीगलौज र धम्की दिने कार्यमा संलग्न रहेको आरोपमा ३२ वर्षीय सुजन खाँण ठकुरीलाई पक्राउ गरिएको जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक प्रसन्न राज चौधरीले जानकारी दिए ।

पुतलीबजार नगरपालिका–८ निवासी ठकुरीलाई चैत १९ गते पुतलीबजार–१ स्थित शहीदचोकबाट नियन्त्रणमा लिइएको डिएसपी चौधरीले बताए ।

घटनासम्बन्धी विद्युतीय अपराधअन्तर्गत मुद्दा दर्ता गरी स्याङ्जा जिल्ला अदालतबाट सात दिनको म्याद थप अनुमति लिई आवश्यक अनुसन्धान अघि बढाइएको जिल्ला प्रहरी कार्यालय स्याङ्जाले जनाएको छ ।

प्रहरीले सामाजिक सञ्जालको दुरुपयोग गरी कसैको मानहानि वा मानसिक यातना दिने कार्य नगर्न सर्वसाधारणलाई सचेत रहन समेत आग्रह गरेको छ ।

-रामबहादुर रोकाहा