प्रदीप अधिकारीको अनुसन्धान राडारमा देखिएका नवीनराज बस्नेत स-परिवार जर्मनी गए

३० चैत, काठमाडौं । नागरिक उड्डयन प्राधिकरण (क्यान) का महानिर्देशक (हाल निलम्बित) प्रदीप अधिकारीसँगको सोझो कनेक्सनमा देखिएका ठेकेदार नवीनराज बस्नेत  विदेश  गएका छन् ।

अधिकारीसँगको कनेक्सनबारे अनलाइनखबरले समाचार प्रकाशन गरेको तीन दिनपछि उनी बाहिरिएका हुन् । दोलखा घर भई हाल भक्तपुरको एक हाउजिङमा बस्दै आएका ३७ वर्षीय बस्नेत १० अप्रिल अर्थात् २७ चैत शुक्रबार त्रिभुवन अन्तर्राष्ट्रिय विमानस्थलबाट बाहिरिएको पाइएको छ ।

उच्च स्रोतका अनुसार बस्नेत कतार एअरवेजको क्यूआर ६४७ नम्बरको फ्लाइटमार्फत शुक्रबार साँझ जर्मनी उडेका हुन् । उनी श्रीमती एलिसा गौतमसहित विदेश गएको भेटिएको छ । कतार एअरवेजको प्यासेन्जर लिस्टको १३औं नम्बरमा बस्नेतको नाम छ ।

बस्नेतकै संलग्नतामा अधिकारीले मुद्दा  सामसुमका लागि शक्तिकेन्द्रमार्फत चलखेल गर्नेदेखि तान्त्रिक र अन्डरवर्ल्ड डनको नाम लिएर धम्क्याउने गरेकोबारे २४ चैतमा अनलाइनखबरले समाचार प्रकाशित गरेको थियो ।

अनलाइनखबरसँगको कुराकानीमा आरोप अस्वीकार गरेका उनै बस्नेत तीन दिनपछि स–परिवार विदेश  गएको भेटिएको छ । स–परिवार विदेश  हिँडेपछि  उनीमाथि लागेको आरोप थप पुष्टि भएको अनुसन्धान अधिकारीहरू बताउँछन् ।

यो पनि पढ्नुहोस

प्रदीप अधिकारीको अनुसन्धान ‘राडार’ मा नवीनराज बस्नेत

भ्रष्टाचारको आरोपमा अख्तियार दुरुपयोग अनुसन्धान आयोगले १७ मंसिरमा अधिकारीलाई पक्राउ गरेर मुद्दा दर्ता गरेको थियो ।

भक्तपुरको नलिञ्चोकस्थित हेलिपोर्ट निर्माणमा अनियमितता भएको आरोपमा पक्राउ परेका अधिकारी २१ मंसिरमा पुर्पक्षका लागि डिल्लीबजार कारागार चलान भए । नलिञ्चोक हेलिपोर्ट प्रकरणमा पक्राउ परेर कारागार चलान भएका अधिकारीविरुद्ध पोखरा अन्तर्राष्ट्रिय विमानस्थलको भ्रष्टाचारका दुई वटा मुद्दा पनि दायर भएको छ ।

नलिञ्चोक हेलिपोर्ट र पोखरा विमानस्थल भ्रष्टाचारमा पक्राउ परी कारागारमा रहेका अधिकारीमाथि अहिले सम्पत्ति शद्धीकरणदेखि संगठित अपराध, आपराधिक लाभ लिन नहुने, आपराधिक षड्यन्त्र गर्न नहुने लगायतको कसुरमा अनुसन्धान भइरहेको छ ।

यही अनुसन्धानको क्रममा बस्नेत पनि जोडिएका हुन् । पहिल्यैदेखि चिनजानमा रहेका र अधिकारीसँग नजिक रहेर काम गर्दै आएका बस्नेतमार्फत अख्तियारलाई मिलाउन प्रयास गरिएको भेटिएको थियो ।

बस्नेत तिनै व्यक्ति हुन् जसले तीन वर्षअघि भैरहवास्थित गौतम बुद्ध अन्तर्राष्ट्रिय विमानस्थल भित्रको ट्याक्सी वे र एप्रोनको ठेक्का लिई काम गरेका थिए । यो ठेक्का आशिष–क्षमादेवी–बुद्ध हिमाली जेभीले पाएको थियो । बस्नेत त्यतिबेला क्षमादेवीमा आबद्ध थिए ।

यो पनि पढ्नुहोस

प्रदीप अधिकारीको योजना : सुशीला सरकार ढाल्ने, आफैं पर्यटन मन्त्री बन्ने

अनलाइनखबरलाई प्राप्त अधिकारी र बस्नेतको ह्वाट्स एप च्याटमा अख्तियारलाई मिलाउनेबारे कुराकानी भएको प्रष्ट देखिन्छ । जहाँ बस्नेतले राजेश बज्राचार्यमार्फत ‘बा’ लाई भनेर अख्तियारबाट भ्रष्टाचारको केस मिलाउने आश्वासन अधिकारीलाई दिएका थिए ।

प्रदीप अधिकारीले २३ नोभेम्बर २०२५ को राति ११:०७ बजे मात्रै ‘राजेश दाइसँग कुरा भयो’ भनेर नवीन बस्नेतलाई ह्वाट्स एपमा म्यासेज गरेको देखिन्छ ।

म्यासेजमा बस्नेतले ११:१० को राति कुर्दै छु, भित्र किचेनमा भनेर जवाफ फर्काउँछन् । बस्नेतले अर्को म्यासेज पठाउँछन्– बासँग पनि भेट्छु । दाइ, मसँगै छौं ।

२५ नोभेम्बरको राति ११:१० बजे बस्नेतले अधिकारीलाई ह्वाट्स एपमा म्यासेज गर्दै ‘गति छाडेर भए पनि गर्छु दाइ, टेन्सन नलिनू’ भनेर म्यासेज पठाउँछन् ।

यो पनि पढ्नुहोस

प्रदीप अधिकारीको स्क्रिप्ट पढेर अख्तियार प्रमुखलाई हत्याको धम्की

यो प्रयासबाट अख्तियारको मुद्दा सामसुम पार्न असफल भएपछि उग्रवादी संगठन खोलेर ज्यान मार्ने धम्की दिँदै अख्तियार प्रमुख प्रेम राईलाई राजीनामा गर्न लगाउनेदेखि तान्त्रिक प्रयोग गर्नेसम्मका काम भएको अनुसन्धानबाट खुलेको छ ।

उग्रवादी संगठनको लेटर प्याडसमेत बनाएर बस्नेतले नै अधिकारीलाई ह्वाट्स एपमा पठाएको देखिन्छ । डीएफएल (डिजिटल फरेन्सिक ल्याब) रिपोर्टअनुसार उक्त लेटर प्याड बस्नेतको मोबाइल नम्बरबाट ह्वाट्स एपमार्फत प्रदीप अधिकारीलाई पठाएको खुलेको छ ।

यही लेटर हेडमार्फत एक सूचना निकाल्दै प्रकाश पाठकले अख्तियार प्रमुखसमेत १० जनालाई ज्यान मार्ने धम्की दिएका थिए । तत्काल राजीनामा नदिए मार्ने धम्की पाठकले भिडियोमार्फत नै दिएका थिए । यसरी धम्की दिन लगाउन पाठकलाई २ करोडको सुपारी दिएकोसमेत पाइएको छ ।

तान्त्रिक विधिबाट आरोप मुक्त हुने उपाय पनि प्रदीप अधिकारीले गरेका थिए । भारतको आसाम राज्यको गुवाहाटीमा रहेको कामाख्या देवी मन्दिरको गुरु बताउने भारतीय तान्त्रिक बाबा ४३ वर्षीय सरया किन्नेरा (जय जगदब्बे) नाम गरेका तान्त्रिक बाबाको प्रयोग गरेको देखिन्छ ।

यो पनि पढ्नुहोस

प्रदीपले मुद्दा मिलाउन खोजेका थिए जेनजीको साथ, मिलाउछु भन्नेको हातमा दिए ५ लाख

जय जगदम्बे बाबालाई अख्तियार प्रमुख राईको फोटो पठाई चम्टा (तान्त्रिक विधिबाट हानि–नोक्सानी) गर्न लगाएको भेटिएको छ । त्यसपछि जय जगदम्बेले अख्तियार प्रमुख राईको प्रतिमा बनाई तान्त्रिक तन्त्र–मन्त्र गर्दै हतियारले घोचेर आगोमा जलाएको भिडियोसमेत तान्त्रिक बाबाले अधिकारीलाई पठाएको भेटिएको छ ।

अहिले ‘फरार’ बस्नेत तिनै व्यक्ति हुन् जो सांसद ‘अपहरण’ गरेर काठमाडौं ल्याएको भनिएको घटनामा पनि जोडिएका व्यक्ति हुन् ।

२०७७ वैशाख १० मा तत्कालीन समाजवादी पार्टी फुटाउने प्रयासमा महोत्तरी पुगेर सांसद तथा पूर्वस्वास्थ्य मन्त्री सुरेन्द्र यादवलाई काठमाडौं ल्याइएको थियो । यो घटनामा अहिले फरार भएका बस्नेत पनि जोडिएका थिए । यसअघि बस्नेतको नाम गुण्डागर्दी पृष्ठभूमिका व्यक्ति पनि जोडिँदै आएको थियो ।