‘कर्मचारीको तजबिजका आधारमा औषधिको भन्सार लगाउने अवस्था अन्त्य हुनुपर्छ’

१२ जेठ, काठमाडौं । नेपाल औषधि आयातकर्ता संघ (मियान) अध्यक्ष पवन आचार्यले औषधिमा कर्मचारीको तजबिजका आधारमा भन्सार लगाउने अवस्था अन्त्य हुनुपर्ने बताएका छन् ।

मंगलबार काठमाडौंमा आयोजित ‘आगामी बजेट र उद्योगी तथा व्यवसायीका साझा मुद्दा’ विषयक अन्तर्कियामा आचार्यले औषधिमा ५ प्रतिशत मात्रै भन्सार लाग्ने कानुनी व्यवस्था भए पनि भन्सारका अधिकारीले तजबिजका आधारमा २८ प्रतिशतसम्म जरिबाना लगाउने गरेको गुनासो गरे ।

‘औषधिमा ५ प्रतिशत मात्रै भन्सार लाग्छ भनिएको छ, औषधि आयात गर्दा नै एमआरपी तय भएको हुन्छ,’ उनले भने, ‘तर, भन्सारमा बिजकलाई आधिकारिकता नदिई २८ प्रतिशतसम्म जरिबाना लगाउने गरिएको छ, भन्सार भनेको अधिकृतको तजबिज होइन, सिस्टमका आधारमा भन्सार लगाइयोस, हाम्रो कारोबार खुला छ, अनलाइन बिलिङ छ, किनेको र बेचेको मूल्य सरकारलाई जानकारी हुन्छ ।’

सरकारले औषधिमा स्वचालित मूल्य कायम गर्न नसक्दा हाल क्यान्सरको उपचारमा प्रयोग हुने ’प्लाटिनम’ समूहका औषधि सिस्पाटिन तथा कार्बोप्लाटिनको अभाव भएको पनि उनले बताए ।

‘सरकारले स्वचालित मूल्य कायम नगर्दा औषधि अभाव हुने अवस्था भयो, हामी सकेसम्म बिरामीलाई सहज रूपमा औषधि आपूर्ति होस् भनेर लागिपरेका छौं,’ उनले भने, ‘सरकारले फेरि अभाव नहुने गरेर स्वचालित मूल्य कायम गरोस् ।’

आचार्यले भारत र बंगलादेशबाट नेपालमा औषधि आयात हुँदै आएको तर हाल पश्चिम एसियाली मुलुकमा जारी द्वन्द्वका कारण कच्चापदार्थमा भारी मूल्यवृद्धि हुँदा भारतमा समेत औषधिको मूल्य उच्च भएको बताए ।

आचार्यले सोमबार मात्रै बंगलादेशबाट ८ सय भायल कार्बोप्लाटिन आयात गरिएको र बिरामीलाई चिकित्सकको प्रेस्क्रिप्सनका आधारमा उपलब्ध गराइएको पनि बताए ।