समाजका सकारात्मक परिवर्तन र नयाँ नेतृत्व पहिचान गर्नु मिडियाको जिम्मेवारी हो : अध्यक्ष भुसाल

२७ साउन, ललितपुर । अनलाइनखबरका अध्यक्ष धर्मराज भुसालले मिडियाको जिम्मेवारी समाचार लेख्ने र सूचना दिनेमा मात्र सिमित हुन नहुने बताएका छन् । उनले समाजमा भइरहेका सकारात्मक परिवर्तनलाई पहिचान गर्नु र नयाँ नेतृत्वलाई सार्वजनिक बहसमा ल्याउने काम पनि मिडियाको उल्लेख गरे ।

अनलाइखबर ४० मुनिका ४० युवाहरूको सूची सार्वजनिक कार्यक्रममा स्वागत मन्तव्य राख्ने क्रममा उनले मिडियाको त्यही दायित्व अनलाइनखबर पुरा गरिरहेको उल्लेख गरे ।

‘अनलाइनखबरका लागि यो कार्यक्रम केवल एउटा बार्षिक सूची हैन । मिडियाको जिम्मेवारी केवल समाचार लेख्ने र सूचना दिनेमा मात्र सिमित हुँदैन । समाजमा भइरहेका सकारात्मक परिवर्तनलाई पहिचान गर्नु, नयाँ नेतृत्वलाई सार्वजनिक बहसमा ल्याउनु र उनीहरुको यात्रालाई दस्तावेज गर्नु पनि हाम्रो जिम्मेवारी हो’ राष्ट्रपति रामचन्द्र पौडेल प्रमुख आतिथ्यतामा भएको कार्यक्रममा उनले भने,’हामीले सम्मान गरेका यी ४० जना युवाहरुले आजको नेपालमात्र हैन, भोलिको सम्भावनाको पनि प्रतिनिधित्व गर्नुहुन्छ ।’

फरक तरिकाले सोच्ने हिम्मत गर्ने, संर्घषलाई आफ्नो साधना ठान्ने र सोचलाई सफलतामा बदल्ने धैर्यता राख्ने नेपालको भविष्यका सम्भावनाहरूलाई एकै फ्रेममा राख्ने प्रयास अनलाइनखबरले गरेको उनले बताए ।

‘चालिस मुनिका चालिसभित्र एउटा उमेरको सीमा छ– चालिस बर्ष । तर यसको उद्देश्य उमेर गन्नुमात्र हैन् । यसको उद्देश्य त्यो उमेरभित्र आफ्नो क्षेत्रमा केही फरक गर्ने, नयाँ सोच ल्याउने, जोखिम उठाउने, अबसर सिर्जना गर्ने र समाजमा प्रभाव पार्ने मानिसहरुलाई पहिचान गर्नु हो’ उनले भने ।

हरेक दशकमा हुने ठूला राजनीतिक परिवर्तनका बाबजुद अगाडी बेराजगारी, युवाको विदेश पलायन, आर्थिक संकट र अवसरको असमानता रहेको उनले उल्लेख गरे ।

‘परिवर्तनका लागि रगत बगाएका युवाहरु हातमा पासपोर्ट बोकेर पसिना बगाउन लामबद्ध छन् । तर, यी चुनौतीहरूबीच अर्को नेपाल पनि निर्माण भइरहेको छ’ उनले भने,’त्यो नेपाल निर्माण गरिरहेका छन्– नयाँ उद्यमीहरूले, प्रविधिमा काम गरिरहेका युवाहरुले, कलाकारले, खेलाडीहरुले, अनुसन्धानकर्ताले, सामाजिक अभियन्ताहरूले र संसारका विभिन्न कुनामा पुगेर आफ्नो क्षमता प्रमाणित गरिरहेका नेपालीहरूले ।’

४० जना युवाहरुले आजको नेपालमात्र हैन, भोलिको सम्भावनाको पनि प्रतिनिधित्व गर्ने उनले बताए । उनले ४० जनाको सूची तयार पार्न अनलाइनखरको टीमले झण्डै चार महिनासम्म अथक मेहेनत गरेको जानकारी दिए ।

‘आवेदन र सिफारिसमार्फत् प्राप्त सयौं नामबाट ४० जना छान्न हामीले समाचार कक्षका सहकर्मी, विभिन्न सरोकारवाला तथा स्रोतहरूको सहयोग लिएका छौं । प्रदेश, जिल्ला, पालिका तथा प्रवाससम्मका सहकर्मी र शुभेच्छुकहरूसँग हामीले सहकार्य गरेका छौं’ अध्यक्ष भुसालले भने ।

उनले यस्तो सूची हरेक वर्ष ल्याउने अनलाइनखबरले यो अभियानलाई व्यवसायिक भन्दा पनि आफ्नो सामाजिक उत्तरदायित्वको रुपमा निरन्तरता दिने प्रतिबद्धता जनाए ।