एप्पलले एआई डेभलपरलाई लक्षित गर्दै नयाँ म्याक मिनी र म्याक स्टुडियो गर्‍यो सार्वजनिक

प्रविधि कम्पनी एप्पलले मंगलबार एआई डेभलपरहरूलाई लक्षित गर्दै नयाँ म्याक मिनी र म्याक स्टुडियो डेस्कटप सार्वजनिक गरेको छ ।

कम्पनीले यी नयाँ मोडलहरूमा एम सिक्स, एम फाइभ प्रो, एम फाइभ म्याक्स र एम फाइभ अल्ट्रा चिपहरू प्रयोग गरेको छ, जसले एआई पर्फमेन्समा उल्लेखनीय सुधार ल्याउने दाबी गरिएको छ ।

एप्पलका अनुसार नयाँ म्याक मिनीमा एम सिक्स वा एम फाइभ प्रो चिप राखिएको छ, जसमा क्रमश: ३२ जिबीसम्म र ६४ जिबीसम्म मेमोरी कन्फिगर गर्न सकिन्छ । म्याक स्टुडियोमा एम फाइभ म्याक्स र नयाँ एम फाइभ अल्ट्रा प्रोसेसरहरू राखिएका छन् ।

कम्पनीले दुवै सिस्टममा एआई पर्फमेन्स, गेमिङ र भिडियो एडिटिङ क्षमतामा ठूलो परिवर्तन आएको जनाएको छ ।

विश्वव्यापी एआई सञ्चालित मेमोरी र स्टोरेज अभावका कारण एप्पलले म्याक मिनीको मूल्य भने बढाएको छ । नयाँ म्याक मिनी ८९९ अमेरिकी डलरबाट सुरु हुन्छ, जुन अघिल्लो मोडलको ७९९ अमेरिकी डलरभन्दा १०० डलर बढी हो ।

एम फाइभ प्रो चिप भएको म्याक मिनी १,६९९ अमेरिकी डलरबाट सुरु हुन्छ । म्याक स्टुडियोको बेस मोडल २,४९९ अमेरिकी डलरमै कायम रहेको छ भने एम फाइभ अल्ट्रा संस्करण ५,४९९ अमेरिकी डलर पर्छ ।

पछिल्लो समय म्याक मिनी र म्याक स्टुडियो एआई इन्जिनियरहरूमाझ लोकप्रिय बन्दै गएका छन् । यिनको सानो आकार, कम मूल्य र डिस्प्ले बिना नै चल्न सक्ने क्षमताले डेभलपरहरूलाई आकर्षित गरेको छ । यी मेसिनहरूमा एआई एजेन्टहरू चलाएर डेभलपरहरूले स्मार्टफोन वा ल्यापटपबाट एक्सेस गर्न सक्ने व्यवस्था मिलाएका छन् ।

कम्पनीका अनुसार बेस म्याक मिनी अर्डर गर्दा एक महिनाभन्दा बढी र म्याक स्टुडियोको लागि १० देखि १२ हप्तासम्म लाग्ने गरेको छ ।

एप्पलले म्याक मिनी र म्याक स्टुडियोको प्रीअर्डर मंगलबारदेखि नै सुरु गरेको छ र सेप्टेम्बर २२, २०२६ देखि शिपिङ सुरु हुनेछ । ५१२ जिबी युनिफाइड मेमोरी संस्करण भने अक्टोबरसम्म उपलब्ध नहुने कम्पनीले जनाएको छ ।