बाढीको ताण्डव: नुवाकोटमा बगर बने बस्तीहरू, झण्डै १५ सय परिवार विस्थापित (फोटो फिचर)

११ भदौ, नुवाकोट । भोटेकोशीमा आएको विनाशकारी बाढीले नुवाकोटमा ठूलो भौतिक क्षति पुर्‍याएको छ। नदी किनारमा रहेका सुन्दर शहर, बस्ती र महत्त्वपूर्ण भौतिक पूर्वाधारहरू बाढीको चपेटामा परेर तहसनहस भएका छन्।

त्रिशूली नदीको किनारैकिनार बसेका कैयौँ बस्तीहरू बाढीले सखाप पारेको छ। स्थानीयका घर र भौतिक संरचनाहरू क्षणभरमै नदीमा विलीन भएका छन्। बाढीको वेगबाट जोगिएर कुनै तरहले उभिएका भवनहरूको मुनि पनि अहिले जमिन छैन, कटानले गर्दा केवल उराठलाग्दो बगर मात्रै बाँकी छ।

घरको जगसम्मै खोलाले खोतलेपछि ती संरचनाहरू पूर्ण रूपमा धरापमा परेका छन्। यसअघि गुल्जार रहेका त्रिशूली, ढुंगेबजार र देवीघाट बजारका किनारहरू अहिले भग्नावशेष र बालुवाको थुप्रोमा परिणत भएका छन्।

बाढीको ठूलो मार यस क्षेत्रका महत्त्वपूर्ण हाइड्रो परियोजनामा परेको छ। नदीको अनियन्त्रित बहावले जलविद्युत आयोजनाका संरचनाहरू बगाएर अकल्पनीय नोक्सानी पुर्‍याएको छ। आयोजनाहरू ध्वस्त भएसँगै नुवाकोटमा विद्युत सेवा पूर्ण रूपमा अवरुद्ध भएको छ। बिजुली नहुँदा बाढी प्रभावित क्षेत्रका नागरिकको दैनिकी थप कष्टकर बनेको छ।

नेपाली सेनाले गर्दैछ एक दर्जन हेलिकप्टरमार्फत उद्धार

बाढी र कटानले स्थलगत आवागमन असहज भएपछि अलपत्र परेका नागरिकको उद्धारका लागि आकाशमार्गको प्रयोग भइरहेको छ। विदुर नगरपालिका वडा नम्बर ४, दम्कीमा रहेको नेपाली सेनाको मैथली ब्यारेकलाई उद्धारको मुख्य केन्द्र बनाइएको छ।

फसेका नागरिकलाई सुरक्षित स्थानमा सार्न अहिले एक दर्जनभन्दा बढी हेलिकप्टरहरू निरन्तर परिचालन गरिएका छन्। नेपाली सेनाको नेतृत्वमा भइरहेको यस उद्धार अभियानले राहतको सास फेर्ने अवसर दिएको छ।

१५ सय परिवार घरबारविहीन

यस प्राकृतिक विपत्तिले हजारौँ नागरिकलाई घरबारविहीन बनाएको छ। नुवाकोटका प्रमुख जिल्ला अधिकारी शम्भु प्रसाद रेग्मीका अनुसार, यो बाढीका कारण नुवाकोट जिल्लामा मात्रै झण्डै १ हजार ५०० परिवार विस्थापित भएका छन्।

आफ्नो सर्वस्व गुमाएका यी हजारौँ परिवारहरू अहिले सुरक्षित आश्रयस्थल र राहतको पर्खाइमा छन्।

अनलाइनखबरकर्मी शंकर गिरीले बाढीग्रस्त क्षेत्र त्रिशूली, ढुंगेबजार र देवीघाट बजार क्षेत्रमा बाढीले मच्चाएको ताण्डव, बगरमा परिणत भएका संरचना र भत्किएका भौतिक पूर्वाधारलाई क्यामरामा कैद गरेका छन् ।