पृथ्वी राजमार्गको विकल्पमा काठमाडौं आउन छुट्टाछुट्टै सवारीलाई तीन रुट तय

News Summary

Generated by OK AI. Editorially reviewed.

धादिङको कृष्णभिरमा सडक अवरुद्ध भएपछि राजधानी काठमाडौंको मुख्य लाइफलाइन पुनः अवरुद्ध बनेको छ।
मकवानपुर प्रशासनले अत्यावश्यक कामविना काठमाडौंतर्फ यात्रा नगर्न सचेत गराउँदै मालबाहकलाई कान्ती लोकपथ र यात्रुबाहकलाई वैकल्पिक मार्ग तोकेको छ।
सडक विभागले पृथ्वी राजमार्गको कृष्णभिर पहिरोबारे प्राविधिक अध्ययन गरिरहेको छ, त्यसपछि मात्र पुनर्निर्माणको समय तय हुने छ।

१४ भदौ, काठमाडौं । धादिङ जिल्लाको कृष्णभिरमा सडक अवरुद्ध भएसँगै राजधानी काठमाडौंको मुख्य लाइफलाइन पुनः अवरुद्ध बनेको छ । जिल्ला प्रशासन कार्यालय मकवानपुरका अनुसार काठमाडौंबाट बाहिरिने र भित्रिने सवारी साधनका कारण अहिले सो जिल्ला हुँदै सवारी आवागमन चाप बढेको छ ।

सोही कारण कार्यालयले अत्यावश्यक कामविना काठमाडौंतर्फको यात्रा नगर्न सचेत गराएको छ । कार्यालयले मालबाहक सवारी साधनलाई कान्ती लोकपथ हुँदै काठमाडौं आवागमन गर्नेगरी तोकेको छ ।

१४ सिट भन्दा ठूला यात्रुबाहक सवारी साधन त्रिभुवन राजपथ हुँदै काठमाडौं जाने र सोही मार्गबाट फर्कने व्यवस्था मिलाइएको कार्यालयले जनाएको छ । १४ सिट भन्दा सानो क्षमताका यात्रुबाहक सवारी साधनलाई भीमफेदी–देउराली हुँदै काठमाडौंतर्फ जाने र आउने व्यवस्था मिलाउन कार्यालयले अनुरोध गरेको छ ।

यस अवधिमा कुनै पनि राजमार्गमा धैर्य र अनुशासन कायम गर्न भनिएको छ । ट्राफिक व्यवस्थापनमा खटिएका सुरक्षाकर्मी र ट्राफिक प्रहरीको निर्देशन पूर्ण पालना गर्न समेत कार्यालयले भनेको छ ।

उता, पुथ्वी राजमार्गको कृष्णभिरमा गएको पहिरोको भने अहिले सडक विभागले प्राविधिक अध्ययन गर्दैछ । त्यसपछि मात्र पुनर्निर्माणको समय तय हुनेछ । सो क्षेत्र यसअघि लामो समय पहिरोग्रस्त बनेको थियो ।