ओपनएआईको ‘प्रोजेक्ट लिली’ : कन्ट्राक्टरहरूलाई च्याटजीपीटीको संवाद हेर्न लगाउँदै

३० भदौ, काठमाडौं। ओपनएआईले च्याटजीपीटीको रिप्लाई सुधार गर्न ‘प्रोजेक्ट लिली’ प्रोजेक्ट सुरु गरको छ। यो योजनाअन्तर्गत सयौं कन्ट्राक्टरहरूलाई प्रयोगकर्ताहरूको च्याट संवाद हेर्न र मूल्याङ्कन गर्न लगाएको खुलेको छ।

यी कन्ट्राक्टरहरूले एआईको रिप्लाई कति स्पष्ट, सहायक र नियमअनुसार छ भनेर एकदेखि सातसम्मको स्केलमा रेटिङ गर्छन्। तर यो प्रक्रियामा गोपनीयताको गम्भीर जोखिम रहेको भन्दै आलोचना पनि भएको छ। यसरी रिभ्यू गर्ने कन्ट्राक्टरले कहिलेकाहीँ पूरा संवाद हेर्छन्, जसमा व्यक्तिगत वा संवेदनशील जानकारी समावेश हुन सक्ने जोखिम देखिन्छ।

यद्यपि त्यसमा प्रयोगकर्ताको नाम देखाइँदैन। तर ड्यासबोर्डमा ‘यूजर मेमोरीज समरी’ देखा पर्न सक्छ। यसबाट प्रयाेगकर्ताले पहिले च्याटजीपीटी केका लागि प्रयोग गर्यो र कहाँ बस्न सक्छ जस्ता विवरणहरू पनि देखाउन सक्ने चिन्ता पनि उत्तिकै देखिन्छ।

ओपनएआईले भने यस्ता संवादहरू मानिसहरूले हेर्नुअघि व्यक्तिगत जानकारी हटाउन ‘प्राइभेसी फिल्टर’ प्रयोग गर्ने बताएको छ। तर कम्पनीले नै यो फिल्टरले कहिलेकाहीँ संवेदनशील विवरणहरू छुटाउन सक्ने स्वीकार गरेको छ।

ओपनएआईको वेबसाइटको एफएक्यू पेजमा पनि २०२३ देखि नै ‘अनुमति प्राप्त कर्मचारी र सेवा प्रदायकहरूले मोडेल प्रदर्शन सुधार गर्न प्रयोगकर्ता डेटा हेर्न सक्ने’ उल्लेख छ। तर कम्पनीले यो कुरा प्रयोगकर्ताहरूलाई स्पष्ट रूपमा सुरुमा बुझाएको थिएन।

यदि प्रयोगकर्ताले आफ्ना च्याट त्यस्ता रिभ्युअरबाट लुकाउन चाहे सेटिङ परिवर्तन गर्नसक्छन्।

प्रयोगकर्ताहरूले सेटिङ्समा ‘इम्प्रोभ द मोडल फर एभ्रीवान’ बन्द गरेर आफ्नो नयाँ च्याटलाई मोडेल तालिम र मानवीय समीक्षामा प्रयोग हुनबाट रोक्न सक्छन्। यो सेटिङ फ्री, प्लस र प्रो एकाउन्टमा डिफल्ट रूपमा खुला हुन्छ।

तर इन्टरप्राइज, बिजनेस र एड्यु एकाउन्टमा भने बन्द हुन्छ। त्यस्तै यसबाट जोगिन कम्पनीले अस्थायी च्याट मोड पनि प्रदान गर्छ, जसमा इनपुट डेटा मोडेल तालिमका लागि प्रयोग हुँदैन।