प्रधानमन्त्री बालेन अमेरिका जाँदा तोडिनेछन् विगतका परम्परा, भीआईपी कक्षमा नबस्ने, सलामी नलिने

६ असोज, काठमाडौं । प्रधानमन्त्री बालेन शाह संयुक्त राष्ट्रसंघको महासभामा भाग लिन आज साँझ अमेरिका प्रस्थान गर्दैछन् । उनको विदेश प्रस्थानको क्रममा केही नयाँ र रोचक लाग्ने दृष्य देख्न पाइने छ ।

अर्थात उनले नेपाली सेनाको सलामी लिने छैनन् भने मन्त्रीसहितका सरकारी पदाधिकारी र उच्चपदस्थ कर्मचारीहरू लाइन लागेर बिदाइ गरेको दृष्य पनि देखिने छैन ।

प्रधानमन्त्री कार्यालय स्रोतले अनलाइनखबरसँग भन्यो, ‘प्रधानमन्त्री विदेश जाँदा र फर्किँदा विगतमा जस्तो सरकारी पदाधिकारी तथा कर्मचारीहरू विमानस्थलमा ताँती लागेर बिदाइ तथा स्वागत गर्ने परम्परा अब तोडिने छ ।’

न्युयोर्क प्रस्थान गर्ने दिन पनि प्रधानमन्त्री बालेन बिहानैदेखि सिंहदरबारस्थित प्रधानमन्त्री तथा मन्त्रिपरिषद्‍को कार्यालयमा काममा व्यस्त छन् । उनी आज साँझ करिब सवा ६ बजे बालुवाटारस्थित निवासबाट विमानस्थलतर्फ प्रस्थान गर्नेछन् । प्रधानमन्त्री बालेन विमानस्थल पुग्नुअघि नै उनका टोलीका सदस्यहरू विमानस्थल प्रवेश गरिसकेका हुनेछन् ।

प्रधानमन्त्री बालेनले भीआईपीहरू आउजाउ गर्ने बाटो प्रयोग गर्नेछन् ।

‘भीआईपी कक्षको बाटो हुँदै प्रधानमन्त्रीज्यू सरासर हवाईजहाजमा चढ्न जानुहुनेछ, भीआईपी कक्षमा समय बिताउनुहुन्न,’ स्रोतले भन्यो, ‘उहाँ चढे लगत्तै जहाज काठमाडौंबाट उड्ने छ ।’

प्रधानमन्त्री शाहकी प्रेस तथा अनुसन्धान विज्ञ दीपा दाहालका अनुसार प्रधानमन्त्री बालेन करिब सात बजे काठमाडौंबाट अमेरिकाका लागि प्रस्थान गर्ने कार्यक्रम छ ।

प्रधानमन्त्री शाहले संयुक्त राष्ट्रसंघको महासभामा जलवायु परिवर्तनका कारण नेपालले भोगिरहेको समस्याबारे अवगत गराउँदै जलवायु न्यायबारे कुरा राख्नेछन् ।

यसअघि प्रधानमन्त्री विदेश भ्रमणमा जाँदा र फर्किँदा कार्यालयको नियमित काम छाडेर समेत उच्च सरकारी अधिकारीदेखि विभिन्न तहका कर्मचारी विमानस्थल पुग्ने गरेका थिए ।

प्रधानमन्त्रीको बिदाइ तथा स्वागतका नाममा विमानस्थलमा सरकारी पदाधिकारीको ठूलो भिड देखिने गरेकोमा यसपटक त्यस्तो दृष्य नदेखिने स्रोतको भनाइ छ ।

‘उहाँले संविधान दिवसको दिनमै पनि पुराना कुरा छाड्छौं भन्नुभएको कुरा तपाईंलाई थाहै होला,’ प्रधानमन्त्री कार्यालय स्रोतले अनलाइनखबरसँग भन्यो, ‘स्वागत र बिदाइमा तामझाम गर्ने स्वभाव प्रधानमन्त्रीज्यूको छैन र अहिलेको विपद्को बेलामा अरूले पनि त्यस्तो गर्नु उचित हुँदैन ।’