टेलर स्विफ्टको नयाँ गीत ‘प्यासेन्ट जिरो’ शुक्रबार आउँदै

लस एन्जलस । अमेरिकी पपस्टार टेलर स्विफ्टले आफ्नो नयाँ गीत ‘प्यासेन्ट जिरो’ सार्वजनिक गर्ने घोषणा गरेकी छन् । यो गीत शुक्रबारदेखि डिजिटल संगीत प्लेटफर्ममा उपलब्ध हुनेछ । उनले हाललाई गीतबारे सीमित जानकारी मात्र सार्वजनिक गरेकी छन् ।

स्विफ्टले सामाजिक सञ्जालमार्फत नयाँ गीतको घोषणा गर्दै लेखेकी छन्, ‘मेरो नयाँ गीत प्यासेन्ट जिरो सेप्टेम्बर २५ मा सार्वजनिक हुँदै छ भन्ने कुरा तपाईंहरूलाई सुनाउन म निकै अधैर्य भएर पर्खिरहेकी थिएँ । अब यो गीत मेरो वेबसाइटमार्फत २४ घण्टाका लागि प्रि-अर्डर गर्न सकिन्छ ।’

उनको आधिकारिक वेबसाइटमा गीतका तीनवटा सीमित संस्करणका सीडी बिक्रीका लागि राखिएका छन् । ती सीडी अक्टोबर १३ देखि ग्राहकलाई पठाइनेछन् ।

नयाँ गीतको घोषणासँगै स्विफ्टले प्रशंसकका लागि थप के ल्याउँदैछिन् भन्ने चर्चा पनि सुरु भएको छ । उनले यसअघि आफ्नो इन्स्टाग्राम बायोमा तीन ठाउँमा अंग्रेजी अक्षर ‘ओ लाई अंक ‘ओ’ मा परिवर्तन गरेर गीतको शीर्षकबारे संकेत दिएकी थिइन् ।

के आउँदै छ ‘टेलर स्विफ्ट (टेलर्स भर्सन) ?

स्विफ्टले आफ्नो पहिलो एल्बम ‘टेलर स्विफ्ट’ सार्वजनिक भएको २० औं वार्षिकोत्सवका अवसरमा त्यसको पुनः रेकर्ड गरिएको संस्करण ‘टेलर स्विफ्ट (टेलर्स भर्सन) ल्याउने चर्चा महिनौंदेखि चलिरहेको छ ।

तर, हाल सार्वजनिक भएका संकेतले ‘प्यासेन्ट जिरो’ उक्त परियोजनासँग सम्बन्धित नभई उनको सन् २०२५ को एल्बम ‘द लाइफ अफ अ शोगर्ल’सँग जोडिएको हुन सक्ने देखाएका छन् ।

यो गीत सन् २०२६ मा पनि ‘शोगर्ल’ एल्बमको सांगीतिक यात्रालाई निरन्तरता दिने सम्भावित नयाँ परियोजनाको सुरुवात हुन सक्ने अनुमान गरिएको छ । यद्यपि, स्विफ्टले यसबारे आधिकारिक जानकारी दिएकी छैनन् ।

नयाँ गीत र ‘शोगर्ल’ बीचको सम्बन्ध

स्विफ्टको वेबसाइटमा उपलब्ध तीनवटा सीडीमध्ये एउटामा गीतको मूल संस्करण छ भने बाँकी दुईमा एकुस्टिक र पियानो संस्करण समावेश छन् ।

ती सीडीबारे जानकारी हेर्दा ‘एड टु कार्ट’ बटनमुनि ‘द लाइफ अफ अ शोगर्ल’ को लोगो देखिन्छ । सीडीका चम्किला किनाराको डिजाइन पनि यसअघि सार्वजनिक भएका ‘शोगर्ल’ संस्करणसँग मिल्दोजुल्दो छ ।

यी संकेतले नयाँ गीत ‘द लाइफ अफ अ शोगर्ल’सँग सम्बन्धित हुन सक्ने सम्भावनालाई बल दिएका छन् ।

‘एन्कोर’ संस्करण आउने सम्भावना

स्विफ्टले दिएका अन्य केही सांकेतिक सन्देशमा ‘एन्कोर’ शब्द पनि भेटिएको छ । यसले ‘द लाइफ अफ अ शोगर्ल’ को नयाँ संस्करण वा त्यससँग सम्बन्धित थप गीत सार्वजनिक हुन सक्ने अनुमानलाई बल दिएको छ ।

सम्भावित नयाँ गीतहरू स्विफ्टले निर्माता म्याक्स मार्टिन र शेलब्याकसँग मिलेर तयार पारेको हुन सक्ने चर्चा छ । यही टोलीले ‘द लाइफ अफ अ शोगर्ल’ मा सहकार्य गरेको थियो । यद्यपि, ती गीत पहिले नै रेकर्ड गरिएका हुन् वा पछि तयार पारिएका हुन् भन्ने स्पष्ट छैन ।

गत वर्ष ‘द लाइफ अफ अ शोगर्ल’ सार्वजनिक गर्दा स्विफ्टले उक्त एल्बममा बोनस गीत वा डिलक्स संस्करण नल्याउने बताएकी थिइन् । एल्बमका १२ गीतले आफूले चाहेको पूर्ण सांगीतिक संग्रह तयार पारेको उनको भनाइ थियो ।

तर उनले आफ्नो निर्णय परिवर्तन गर्न वा सोही सांगीतिक शैलीमा थप काम गर्न पुनः स्टुडियो फर्कन सक्ने सम्भावना पनि छ । त्यस्तो अवस्थामा नयाँ परियोजना डिलक्स संस्करणभन्दा पनि ‘शोगर्ल’ को सिक्वेलका रूपमा आउन सक्छ ।

हालका लागि भने स्विफ्टले सेप्टेम्बर २५ मा ‘प्यासेन्ट जिरो’ सार्वजनिक गर्ने मात्र पुष्टि गरेकी छन् ।