२०८३ असोज ९ गते १४:२९ 
News Summary
Generated by OK AI. Editorially reviewed.- एसियन गेम्स क्रिकेटमा नेपालले अफगानिस्तानलाई ५ विकेटले हराउँदै १०३ रनको लक्ष्य १७.२ ओभरमा पूरा गरेको छ।
- कप्तान दीपेन्द्रसिंह ऐरीले नेपाल पदक जित्ने लक्ष्यसहित अघि बढिरहेको र टोलीले १०० प्रतिशत दिएको बताएका छन्।
- कुशल भुर्तेलले ४ र ललित राजवंशीले ३ विकेट लिएपछि नेपालले अफगानिस्तानलाई २० ओभरमा १०२ रनमा रोकेको छ।
९ असोज, काठमाडौं । २०औं एसियन गेम्स अन्तर्गत क्रिकेटको पहिलो खेलमा अफगानिस्तानलाई हराएपछि नेपाली टोलीका कप्तान दीपेन्द्रसिंह ऐरीले टोली पदक जित्ने लक्ष्यका साथ अघि बढिरहेको बताएका छन् ।
अफगानिस्तानले दिएको १०३ रनको लक्ष्य नेपालले १७.२ ओभरमा ५ विकेट गुमाउँदै पूरा गरेको थियो । नेपालका लागि सन्दीप जोराले ३४, रोहित पौडेलले अविजित ३३ तथा दीपेन्द्रले १५ रन बनाए ।
खेलपछि दीपेन्द्रले टसले खेलको दिशा तय नगर्ने भन्दै नेपालले सुरुदेखि नै विपक्षीलाई दबाबमा राखेको बताए ।
‘टस हाम्रो हातमा हुँदैन। हामीले पनि ब्याटिङ नै गर्ने सोचेका थियौं, तर उनीहरूले ब्याटिङ रोजे । हामीले बलिङ निकै राम्रो गर्यौं’ उनले भने ।
नेपालले अफगानिस्तानलाई २० ओभरमा ७ विकेटमा १०२ रनमा रोक्दा कुशल भुर्तेलले ४ र ललित राजवंशीले ३ विकेट लिएका थिए । दीपेन्द्रले स्पीनरहरूको प्रदर्शन निर्णायक बनेको बताए ।
‘स्पिनरहरूले राम्रो गर्छन् भन्ने सोचेका थियौं । ललित र कुशलले उत्कृष्ट बलिङ गरे । कम स्कोरमा रोक्न सक्यौं, त्यसैले लक्ष्य पछ्याउन सजिलो भयो’ उनले भने ।
दीपेन्द्रले आफ्नो ब्याटिङबारे बोल्दै परिस्थिति अनुसार जोखिम कम लिएको बताए । ‘म टिकें भने खेल जिताउन सजिलो हुन्छ भन्ने सोच थियो । त्यसैले धेरै रिस्क लिइनँ’ उनले भने ।
समूह चरणको अन्तिम खेल शनिबार जापानसँग हुँदैछ । जिते नेपाल समूह विजेता बन्नेछ भने क्वाटरफाइनलमा श्रीलंकासँग भेट हुनेछ ।
‘भोलिको खेल पनि उत्तिकै महत्त्वपूर्ण छ । पिचमा टर्न र बाउन्स दुवै छ, त्यही अनुसार तयारी गर्छौं’ दीपेन्द्रले भने ।
उनले पदक सम्भावनाबारे पनि आत्मविश्वास व्यक्त गरे । ‘टिम निकै बुस्टेड छ, अनुभव पनि छ । मेडल ल्याउन हाम्रो तर्फबाट १०० प्रतिशत दिएका छौं’ उनले भने ।
उता, ४ विकेट लिएका कुशल भुर्तेलले ब्याटिङमा शून्यमै आउट भए पनि बलिङबाट योगदान दिन पाउँदा खुसी लागेको बताए ।
‘जहाँ जाँदा पनि नेपाली दर्शक आउनुभएको हुन्छ । चीनभन्दा यहाँ अझ धेरै माया दिनुभएको छ’ भुर्तेलले भने, ‘ब्याटबाट आज राम्रो हुन सकेन, तर बलिङमा योगदान दिन सकें, त्यसमा खुसी छु ।’
प्रतिक्रिया 4