कांग्रेसकी पूर्वसचेतक ईश्वरीदेवीले सहमहामन्त्रीमा उम्मेदवारी दिने

१८ असोज, काठमाडौं। नेपाली कांग्रेस संसदीय दलकी पूर्वसचेतक तथा राज्य व्यवस्था तथा सुशासन समितिकी पूर्वसभापति ईश्वरीदेवी न्यौपानेले नेपाली कांग्रेसको १५औं महाधिवेशनमा सहमहामन्त्री पदमा आफ्नो उम्मेदवारी घोषणा गरेकी छन् ।

नेपाली कांग्रेसको संगठन निर्माण, लोकतान्त्रिक आन्दोलन तथा संसदीय राजनीतिमा लामो समयदेखि सक्रिय आएकीकी न्यौपानेले पार्टीलाई थप सशक्त, लोकप्रिय र जनतासँग जोडिएको संगठनका रूपमा विकास गर्ने प्रतिबद्धतासहित सहमहामन्त्री पदमा उम्मेदवारी घोषणा गरेकी हुन् ।

नेपाली कांग्रेसको केन्द्रीय सदस्यका रूपमा तीन पटक जिम्मेवारी सम्हालिसकेकी न्यौपाने पार्टीभित्रको संगठनात्मक जिम्मेवारीसँगै संसदीय भूमिकामा समेत महत्वपूर्ण जिम्मेवारी निर्वाह गर्दै आएकी नेतृ हुन् । उम्मेदवारी घोषणा गर्दै न्यौपानेले नेपाली कांग्रेसलाई अझ लोकप्रिय, सुदृढ र जनताको भरोसाको पार्टीका रूपमा स्थापित गर्न आफूले महत्वपूर्ण भूमिका निर्वाह गर्ने बताएकी छन् ।

‘नेपाली कांग्रेसलाई लोकप्रिय पार्टी निर्माण गर्ने, संगठनलाई अझ मजबुत बनाउने र देशकै नम्बर एक पार्टीका रूपमा स्थापित गर्ने अभियानमा मेरो महत्वपूर्ण भूमिका रहनेछ, त्यसकारण मलाई मतदान गरेर यो अवसर प्रदान गर्न सम्पूर्ण महाधिवेशन प्रतिनिधिज्यूहरूमा हार्दिक अपिल गर्दछु’, न्यौपानेले भनिन् ।

पार्टीको संगठनलाई गाउँदेखि केन्द्रसम्म थप व्यवस्थित र प्रभावकारी बनाउँदै नयाँ पुस्तालाई कांग्रेसको मूलधारमा जोड्नुपर्ने आवश्यकता रहेको न्यौपानेले बताइन् । पार्टीभित्रको एकता, संगठनको सुदृढीकरण, कार्यकर्ताको सम्मान तथा जनतासँगको सम्बन्धलाई थप बलियो बनाउँदै कांग्रेसलाई आगामी दिनमा थप प्रभावकारी राजनीतिक शक्तिका रूपमा स्थापित गर्न आफ्नो उम्मेदवारी केन्द्रित रहेको उनको भनाइ छ ।

लामो समयदेखि कांग्रेसको राजनीतिमा सक्रिय न्यौपानेको उम्मेदवारीलाई १५औं महाधिवेशनमा महिला नेतृत्वको सशक्त प्रतिनिधित्वका रूपमा हेरिएको छ । पार्टीको केन्द्रीय नेतृत्वमा महिलाको सहभागिता र भूमिकालाई थप प्रभावकारी बनाउने विषयलाई पनि उनले प्राथमिकतामा राखेकी छन् ।

आइतबारदेखि सुरू महाधिवेशनमा सहमहामन्त्री पदका लागि उम्मेदवारी घोषणा गर्दै न्यौपानेले आफ्नो राजनीतिक अनुभव, संगठन निर्माणमा हासिल गरेको अनुभव र पार्टीप्रतिको निरन्तर योगदानलाई आगामी कार्यकालमा अझ प्रभावकारी रूपमा प्रयोग गर्ने प्रतिबद्धता व्यक्त गरेकी छन् ।