सन् २०२६ कै शक्तिशाली बन्यो सुपर टाइफुन चम्पी

४ कात्तिक, काठमाडौं । पश्चिमी प्रशान्त महासागरको माइक्रोनेसिया क्षेत्रनजिक विकसित भएको सुपर टाइफुन चम्पी सन् २०२६ कै शक्तिशाली समुद्री आँधीमध्ये एक बनेको छ ।

वेदर नेटवर्कका अनुसार हावाको गतिका आधारमा सुपर टाइफुन चम्पी सन् २०२६ को विश्वकै शक्तिशाली उष्णकटिबन्धीय चक्रवात हो ।

पश्चिमी प्रशान्त महासागरमा विकसित यस आँधीको अधिकतम हावाको गति २९६ किलोमिटर प्रतिघण्टा पुगेको छ । यो गति पाँचौँ श्रेणीको शक्तिशाली आँधीको स्तरमा पर्छ ।

यसअघि पूर्वी प्रशान्त महासागरमा विकसित हरिकेन पोलो सन् २०२६ को सबैभन्दा शक्तिशाली उष्णकटिबन्धीय चक्रवात थियो । पोलोको अधिकतम निरन्तर हावाको गति २८५ किलोमिटर प्रतिघण्टा पुगेको थियो ।

तर वायुमण्डलीय चापका आधारमा भने पोलो चम्पीभन्दा शक्तिशाली देखिएको छ । पोलोको न्यूनतम हावाको चाप ८९२ मिलिबार मापन गरिएको थियो भने चम्पीको ८९५ छ । समुद्री सतहमा औसत हावाको चाप करिब १ हजार १३ मिलिबार हुन्छ ।

चम्पीले स्थानीय समयअनुसार आइतबार बिहान गुआम क्षेत्र पार गर्दा राडारमा यो निकै शक्तिशाली देखिएको थियो ।

किन शक्तिशाली बन्यो चम्पी ?

यो शक्तिशाली समुद्री आँधी अक्टोबर ११, २०२६ मा उष्णकटिबन्धीय न्यून चापीय प्रणालीका रूपमा विकसित भएको थियो । तर पछि समुद्रको न्यानो पानी र अनुकूल वायुमण्डलीय अवस्थाका कारण यो तीव्र हुँदै सुपर टाइफुनमा परिणत भएको हो ।

EARTH’S STRONGEST STORM 🌏: Super Typhoon Champi has exploded to Category 5-equivalent strength with maximum sustained winds of 185 mph, tying Super Typhoon Sinlaku as the strongest storm on Earth in 2026 by wind speed. Champi recently passed near Guam and is now churning across the western Pacific.

— FOX Weather (@foxweather) October 20, 2026

पश्चिमी प्रशान्त महासागरको उक्त क्षेत्रमा समुद्रको सतहको तापक्रम करिब ३० डिग्री सेल्सियस पुगेको छ । यो वर्षको यस समयको औसतभन्दा केही बढी हो । समुद्रको न्यानो सतहले आँधीलाई ऊर्जा उपलब्ध गराउन सहयोग गर्छ ।

त्यसैगरी, चम्पी आसपासको वायुमण्डलमा पर्याप्त आद्रता, कमजोर हावाको अवरोध र माथिल्लो वायुमण्डलमा अनुकूल अवस्था रहेकाले यसलाई तीव्र बन्न सहयोग पुगेको छ । आँधीको भित्री संरचना व्यवस्थित रहनु पनि यसको शक्ति कायम राख्ने महत्त्वपूर्ण कारण हो ।

ताइवानतर्फ अघि बढ्दै, कमजोर हुने अनुमान

चम्पी पश्चिमतर्फ अघि बढ्दै ताइपेईतर्फ जाने र त्यसपछि यसै साताको उत्तरार्धमा उत्तरपश्चिमतर्फ मोडिने अनुमान गरिएको छ ।

तर अघि बढ्ने क्रममा यसले कम अनुकूल वायुमण्डलीय अवस्था सामना गर्नुपर्ने भएकाले बिहीबार र शुक्रबारसम्म यसको शक्ति घटेर चौथो वा तेस्रो श्रेणीमा झर्ने पूर्वानुमान गरिएको छ ।

 विश्वका विभिन्न क्षेत्रको मौसम प्रणालीमा पनि प्रभाव पर्ने

चम्पीजस्तो शक्तिशाली आँधीको प्रभाव यसको आसपासको क्षेत्रमा मात्रै सीमित हुँदैन । यसले जेट स्ट्रिम अर्थात् माथिल्लो वायुमण्डलमा तीव्र गतिमा बहने हावाको प्रवाहमा समेत परिवर्तन ल्याउन सक्ने अनुमान छ । त्यसको असर विश्वका विभिन्न क्षेत्रको मौसम प्रणालीमा पर्न सक्छ ।

चम्पीको प्रभावले उत्तर अमेरिकाको मौसम प्रणालीमा समेत असर पार्ने अनुमान गरिएको छ ।

क्यानडाको ओन्टारियो र क्युबेक प्रान्तमा अक्टोबरको अन्त्यदेखि नोभेम्बरको सुरुसम्म मौसम परिवर्तनशील र अस्थिर बन्न सक्ने पूर्वानुमान छ । अर्को साताको मध्य र उत्तरार्धमा सुरु हुने यस्तो अवस्था त्यसपछिको सातासम्म पनि लम्बिन सक्छ ।

यी क्षेत्रमा सामान्यभन्दा न्यानो तापक्रमको प्रभाव कायम रहने अपेक्षा गरिए पनि बीचबीचमा मौसममा तीव्र परिवर्तन आउने सम्भावना छ ।

चम्पीको मार्ग, यसको शक्तिमा आउने परिवर्तन र जेट स्ट्रिममा पर्ने प्रभावले आगामी दिनमा क्यानडाको मौसमको स्वरूप निर्धारण गर्न महत्त्वपूर्ण भूमिका खेल्ने अनुमान गरिएको छ ।