जेन्सेन हुआङको महिला कर्मचारीसँग पनि सम्बन्ध, एनभिडियाको सीईओबाट हटाउने तयारी

२६ कात्तिक, काठमाडौं । विश्वकै सबैभन्दा ठूलो चिप निर्माता कम्पनी एनभिडियाका सीईओ जेन्सेन हुआङको दोस्रो अफेयर बारे पनि खुलासा भएको छ।

न्युयोर्क टाइम्सको रिपोर्टअनुसार, हुआङको एनभिडियाकै एक महिला अधिकारीसँग अफेयर थियो। ती अधिकारीको पहिचान कम्पनीकी हेल्थकेयर भाइस प्रेसिडेन्ट किम्बर्ली पावेलका रूपमा गरिएको छ। उनले सिधै जेन्सेन हुआङलाई रिपोर्ट गर्थिन्।

यसअघि जेन्सेनले चिनियाँ जासुस मानिएकी एलिस हुआङसँगको अफेयरबारे स्वीकार गरिसकेका थिए। यस विवादको असर कम्पनीको सेयरमा पनि परेको छ। कम्पनीको बजार मूल्य ३०० अर्ब डलर भन्दा बढीले घटिसकेको छ।

एनभिडियाले अब जेन्सेनलाई सीईओ पदबाट हटाउने तयारी गरिरहेको छ। बिहीबार बस्ने बैठकमा यसबारे निर्णय लिइनेछ।

ट्रम्पलाई जेन्सेनको अफेयरबारे ६ महिनाअघि नै थाहा थियो

सिएनएनको रिपोर्टअनुसार, अमेरिकी विदेशमन्त्री मार्को रुबियोले राष्ट्रपति डोनाल्ड ट्रम्पलाई यसै वर्षको मे महिनामा उनको चीन भ्रमणअघि नै यसबारे जानकारी दिएका थिए।

ट्रम्पलाई दिइएको गुप्तचर मेमोमा हुआङको सम्बन्ध एक यस्ती महिलासँग रहेको बताइएको थियो, जसलाई अमेरिकी अधिकारीहरूले चिनियाँ जासुस मानिरहेका थिए।

यति हुँदाहुँदै पनि ट्रम्पले हुआङलाई बेइजिङ लगेका थिए। उनले अलास्काबाट राष्ट्रपतिसँग एयर फोर्स वान विमानमा यात्रासमेत गरेका थिए।

यद्यपि, ह्वाइट हाउसले यो रिपोर्टलाई खारेज गरेको छ। यसैबीच, अमेरिकी सांसदहरूले जनवरीमा कंग्रेसको नयाँ सत्र सुरु भएपछि यस मामिलामा विस्तृत अनुसन्धान गरिने सङ्केत दिएका छन्।

जेन्सेनले लेखे– ‘मबाट गल्ती भयो, म लज्जित छु’

जेन्सेन हुआङले आइतबार एनभिडियाका सबै कर्मचारीहरूलाई एक आन्तरिक सन्देश पठाएका थिए। यसमा उनले आफ्नी पत्नीप्रति इमानदार नरहेको कुरा स्वीकार गरेका छन्।

हुआङले लेखेका छन्, ‘मेरो यो कदमले मेरी पत्नी र सन्तानलाई गहिरो चोट पुगेको छ। मलाई यसमा पछुतो छ। मेरो जिम्मेवारी तपाईंहरू सबैको विश्वास कायम राख्नु थियो, तर म यसमा असफल भएँ।’

यद्यपि, आफ्नो यो सन्देशमा उनले कुनै पनि महिलाको नाम भने उल्लेख गरेका छैनन्।

एलिस-जेन्सेनको सम्बन्ध र जासुसी प्रकरणको अनुसन्धान सुरु भएयता एनभिडियाको सेयर ५ प्रतिशतसम्मले घटेको छ।

जेन्सेनको सम्पत्ति ११.२३ लाख करोड नेपाली रुपैयाँले घटिसकेको छ। जेन्सेन फोर्ब्सको धनीहरूको सूचीमा दुई स्थान तल झरेर १०औँ स्थानमा पुगेका छन्।

यस उथलपुथलका बीच लगानीकर्ताहरू आगामी १७ नोभेम्बरमा आउने कम्पनीको त्रैमासिक नतिजा पर्खिरहेका छन् ।