वीरेन्द्र रमण
२५ असोज, जनकपुर । मधेस आन्दोलनका अगुवा युवाहरुले जनकपुरमा मधेसी मोर्चाका नेताहरुकै पुत्ला जलाएका छन् ।
आइतबार संसदमा भएको प्रधानमन्त्रीको निर्वाचनमा भाग लिएर मधेसविरुद्ध लागेको भन्दै युवाहरुले संघीय मधेसी मोर्चा र संयुक्त लोकतान्त्रिक मधेसी मोर्चाका नेताहरुको पुत्ला जलाएका हुन् ।
जनकपुरको जनक चौकमा भएको पुत्ला दहन कार्यक्रममा सहभागीहरुले मोर्चाका नेताहरुले गद्धारी गरेको आरोप लगाए ।
आन्दोलनका अगुवा ईन्द्रकुमार मधेसानन्दले मधेसको गदारी गर्नेहरुलाई मधेसी जनताले कुनैपनि हालतमा नछाड्ने बताए । मधेस आन्दोलनलाई कमजोर बनाउने खोजेका मोर्चाका नेताहरुकै पुत्ला जलाएको उनले बताए ।
भरत रायले मधेसी जनताको भावना विपरित गएर मोर्चाका नेताहरुले मधेसी शहिदको रगतलाई लत्याएको आरोप लगाए । महाशंकर ठाकुरले मधेसी मोर्चाका नेताहरुले सत्ता र भत्ताको लोभमा सरकार निर्माण गर्न खेलमा लागेको भन्दै आक्रोस पोखे ।
मधेसी मोर्चाका नेताहरुको पुत्ला दहन कार्यक्रममा सयौंको संख्यामा सर्वसधारण सहभागी भएका थिए ।
