सवा क्विन्टल तौलकी युवतीले वर्षदिनमै घटाइन् ६० किलो वजन, जितिन् बिकिनी प्रतिस्पर्धा

आखिर मानिसले कुनै दृढ प्रतिज्ञा गर्ने हो भने पूरा गर्न नसकिने भन्ने कुरा केही छैन । मोटोपनाबाट पीडित भएकी र हैरानी खेप्दै आएकी एक युवतीले एक वर्षमै आफ्नो जिउको वजन ५९ किलो घटाएकी छिन् ।

१ सय २३ किलो तौलकी कोनेर रेस्च आफ्नो तौलकै कारण मोटी तथा भद्दा केटीको रुपमा कुख्यात बन्न थालेपछि तौल घटाउने प्रतिज्ञा गरिन् र त्यसमा सफल पनि भइन् । अहिले उनी युवतीहरुका लागि फिटनेसको रोल मोडल बनेकी छिन् ।

अमेरिकाको  नेब्रास्काकी बासिन्दा कोनरको उमेर २६ वर्ष हो । उनले आफ्नो निजि ट्रेनर तथा पोषण विज्ञको सहयोगमा वर्षदिनमै ५९ किलो तौल घटाउन सफल भएकी हुन् । उनको तौल अहिले सामान्य युवतीको जत्तिकै अर्थात् ६४ किलो छ । उनी सोसल साइट इन्स्टाग्राममा निकै चर्चित पनि छिन् । इन्स्टाग्राममा उनका ३६ हजार भन्दा बढि फलोअर्स छन् ।

उनले एक वर्षमा जिउको तौल झण्डै आधाले घटाउन सफल मात्र भइनन् अर्को महत्वपूर्ण उपलब्धी पनि हात पारिन् ।

गत वर्ष उनले वल्र्ड ब्यूटी फिटनेस एण्ड फेसन प्रतियोगितामा भाग लिइन् र उक्त प्रतियोगिता अन्तरगत उत्कृष्ट बिकिनी ब्युटीको उपाधि हात पारिन् ।

कोनेरका अनुसार पहिले उनलाई सोसल साइटमा आफ्ना तस्वीर अपलोड गर्न पनि लाज  र डर लाग्थ्यो । आफुले जिन्दगीमा कहिल्यै सुन्दरी प्रतियोगितामा भाग लिएर उत्कृष्ट बिकिनी सुन्दरीको उपाधि जितुँला भन्ने उनलाई कहिल्यै पनि लागेको थिएन रे ।

तौल घटाएसँगै जब उनले पहिलोपटक बिकिनी लगाइन् तब उनको आत्मविश्वास ह्वात्तै बढ्यो । त्यसपछि उनले पछाडि फर्केर सोँचिनन् र अन्ततः सफलता पनि प्राप्त गरिन् ।

मोटी छँदा उनी अगस्ती जस्तै खन्चुवा थिइन् । उनले लगातार खाइरहन्थिन् र उनलाई निकै भोक पनि लागिरहन्थ्यो । जसका कारण उनको वजन लगातार बढिरहेको थियो ।

त्यसपछि उनी एक निजि ट्रेनरसँग भेट गरिन् । उनैबाट किक बक्सिङ, कार्डियो तथा भारत्तोलन लगायतका फिटनेस टिप्स प्राप्त गरिन् र नियमित रुपमा व्यायाम गर्नुका साथै खानपिनमा पनि नियन्त्रण गरिन् । त्यसो गर्न थालेपछि त उनले केवल २१ दिनमै आफ्नो वजन १० किलो घटाउन सफल भइन् । अन्ततः एक वर्षको अवधिमा उनले जिउको वजन ५९ किलो घटाएर जिउलाई फिट बनाइन् ।