वडाअध्यक्षको नाममा सूचना टाँसेर ‘सफाया’ गर्ने चेतावनी

७ कार्तिक, बुटवल । वडा अध्यक्ष र केही जग्गा व्यवसायीको नामबाट ज्यान मार्ने धम्की आएपछि वुटवलमा एक व्यक्तिले जीवन रक्षाको अपील गरेका छन् ।

बुटवल उपमहानगरपालिका १७ का वडा अध्यक्ष सन्तबहादुर रानासहित ८ जनाले दशैं र तिहारभित्र ज्यान लिने धम्की दिएको भन्दै ५० वर्षका प्रेमसागर तिवारीले प्रहरीसमक्ष शान्ति सुरक्षाको माग गरेका हुन् ।

वडा अध्यक्ष रानासहित सोही वडाका चिन्तामणि पाण्डे, हरिलाल न्यौपाने, विशाल विश्वकर्मा, लालु खड्का, राजेशमान श्रेष्ठ, ढुण्डीराज भण्डारी र दीपक न्यौपानेको नाम उल्लेख भएको पर्चामा तिवारीलाई पटकपटक मार्ने प्रयास गरिएको तर यसपटक दशैं र तिहारभित्र सफाया गरिछाड्ने चेतावनी दिइएको छ ।

वस्तीमा रहेका विदुतका पोलहरुमा टाँसिएका उक्त पर्चामा तिवारीको सफायासंगै वडा नंं १७ को जनसंघर्षटोल -सुकुम्बासी वस्ती) मा रहेका घरहरुमा नगरपालिकाको सहयोगमा डोजर लगाएर भत्काइदिने चेतावनी समेत दिइएको छ ।

तिवारीले १५ वर्षदेखि उक्त टोलमा आफूहरुको जग्गा हडपेर सुकुम्बासीलाई वितरण गरी वस्ती बसालेको उल्लेख गरिएको छ । तिवारीले भने वस्ती बसेको जग्गा सरकारी जग्गा भएको र अख्तियार दुरुपयोग अनुसन्धान आयोगमा आफैले मुद्दा हालेपछि जग्गा दावी गर्नेको विपक्षमा फैसला भएपछि उनीहरुले आफूलाई निशाना बनाएको दावी गरे ।

आफूलाई ज्यान लिने धम्की दिने व्यक्तिहरु भूमाफिया भएको आरोप लगाउंदै उनले उनीहरुको जग्गाबारे अख्तियारले पुनः छानबिन गर्नुपर्ने माग गरे । निजहरुले सरकारी जग्गा किर्ते गरेर आफ्नो नाममा बनाउने काम गरिरहेको र लालपुर्जामा उल्लेख गरे भन्दा धेरै सरकारी जग्गा हडपेको दावी गरे ।

वडाअध्यक्ष रानाले तिवारीको ज्यान लिने धम्कीमा आफ्नो संलग्नता नरहेको बताए । ‘यो कसले गरेको हो मलाई जानकारी छैन’, रानाले भने ‘मेरो नाम जोडेर कस्ले यस्तो काम गरेको हो सुरक्षा निकायले अनुसन्धान गरी आवश्यक कारवाही गर्नुपर्छ ।’

हेर्नुस् सूचना