सिरहामा आगलागी, २ बालिकासहित ३ को जलेर मृत्यु

१० चैत, सिरहा । जिल्लाको छुट्टाछुट्टै स्थानमा शनिबार भएको आगलागीमा २ बालिकासहित ३ जनाको जलेर ज्यान गएको छ ।

जिल्लाको धनगढीमाई नगरपालिका–१४ मा आगलागीमा हुँदा दुई बालिकाको जलेर मृत्यु भएको प्रहरीले जनाएको छ ।

आगलागीमा दीपक धमलाकी ६ वर्षीया छोरी दीक्षा धमला र नित पोखरेलकी ७ वर्षीया छोरी रीता पोखरेलको जलेर ज्यान गएको हो ।

गोठमा खेल्दै गरेको बेला बालिएको घुरबाट आगो सल्केको प्रहरीको प्रारम्भिक अनुसन्धानबाट खुलेको छ । घरमा कोही नभएका बेला लागेको आगोको भेउ नपाउँदा दुवै बालिका त्यही जलेको प्रहरीले जनाएको छ ।

त्यस्तै, जिल्लाकै कल्याणपुर नगरपालिका–७ स्थित घरमा सुतिरहेकै अवस्थामा आगलागी हुँदा ६५ वर्षीया वनारसीदेवी सदाको जलेर मृत्यु भएको छ ।

सदाको घरमा एक्कासि आगो लाग्दा उनीसहित घर जलेको छ । जसबाट १ लाखभन्दा बढीको धनसम्पत्ति जलेर नष्ट भएको छ । प्रहरीले आगलागीको कारण नखुलेको र यसबारे अनुसन्धान भइरहेको जनाएको छ ।