सुनसान असन, सामान किन्न ३ फिटको दुरी (फोटो फिचर)

१७ चैत, काठमाडौं । काठमाडौंको प्रमुख बजार असन हिजोआज चकमन्न छ । लकडाउनका कारण मानिस घरबाहिर ननिस्केपछि दैनिक हजारौं मानिसको घुइँचो हुने असनमा हिजोआज फाट्टफुट्टमात्र पैदलयात्री भेटिन्छन् ।

सामान्य समयमा पैदल हिँड्न पनि मान्छे ठेल्दै हिँड्नु पर्ने असनमा अहिले दिनभरमा एकाध मान्छेमात्र देखिन्छ । लकडाउनको छैठौं दिन आइतबार रत्नपार्कबाट भोटाहिटीहुँदै असन जाँदा असन चोकमा दुई जना सुरक्षाकर्मीबाहेक अरु कोही थिएनन् । सुनसान असन छिचाल्दै थ्योरमा पुग्दा भने अलिकति माहोल बढेको थियो ।

झमक्क साँझ पर्नै लागेकाले उपभोक्ताहरु तरकारी, फलफुल तथा खाद्यान्न किन्नका लागि त्यहाँ उपस्थित थिए । तर, अन्य ठाउँमा जस्तो जथाभावी उपभोक्ता उभिएका थिएनन् ।

त्यहाँका व्यापारीले सामान किन्न ३ फिटको दुरी कायम हुने गरी ग्राहक उभिने ठाउँ बनाइदिएका छन् । सर्वसाधारणको भिड नबढोस् भनेर स्वयंसेवक टोली नै खटिएका हुन्छन्।

‘यहाँ आउनेहरु बुझ्दै बुझ्दैनन्, त्यही भएर हामी नियम पालना गराउन यहाँ खटिएका छौं’ काठमाडौं महानगर वडा नम्बर २७ का वडा सदस्य प्रवेशमान बज्राचार्यले भने ।

उनका अनुसार वडा कार्यालयले पसल अगाडि पहेँलो रङले घेरो बनाइदिएको छ । त्यहाँ किन्न आउने व्यक्तिहरु उक्त घेरोभित्र मात्र बस्नुपर्छ । घेरोहरुबीचको दुरी ३ फिटको छ ।

व्यक्तिहरुबीच ३ फिट दुरी कायम राखे कोरोना भाइरस सर्न सक्दैन भन्ने मान्यता छ । व्यापारी र ग्राहक दुबै पक्षलाई मास्क लगाउन अनिवार्य गरिएको छ ।

तस्बिरहरु हेर्नुहोस्