लकडाउन पालनामा सहयोग गर्न तरुण दलको परिपत्र

१८ चैत, काठमाडौं । नेपाली कांग्रेसको युवा संगठन तरुण दलले सरकारले लागू गरेको लकडाउन पूर्ण पालनामा सहयोग गर्न आफ्ना जिल्ला समितिहरुलाई निर्देशन दिएको छ ।

तरुण दलले मंगलबार जिल्ला समितिलाई परिपत्र गरी यो अवधिमा दैनिक जीवन कठिन बन्न सक्ने भएकाले स्थानीय प्रशासनको अनुमति लिई सर्वसाधारणलाई सहयोग गर्न आग्रह गरेको छ ।

तरुण दलले बाहिरी मुलुकबाट आएका व्यक्तिलाई क्वारेन्टाइनसम्म पुर्‍याउन सहयोग गर्ने, आफ्नो ठाउँका मानिसलाई कुनै समस्या परे सहयोग गर्ने, लकडाउनका कारण गन्तव्यमा पुग्न नसकी बीच बाटोमा अलपत्र परेकालाई गन्तव्यसम्म पुर्‍याउन र खान बस्नको व्यवस्थापन गर्न आग्रह गरेको छ ।

त्यस्तै खाद्यान्न, तरकारी, दुध, औषधि, पानीलगायत दैनिक उपभोग्य सामान खरिद गर्दा भीड हुन नदिन सहयोग गर्ने,ज्याला मजदुरी गरेर साँझ विहानको छाक टार्ने वर्गलाई जीवन निर्वाहका लागि सहयोग गर्न पनि निर्देशन दिएको छ ।

भारतबाट फर्किने क्रममा विभिन्न सीमा नाकामा अलपत्र परेका नेपालीलाई क्वारेन्टाइनमा बस्ने गरी नेपाल भित्रन सहजीकरण गर्न, लकडाउनको अवधिमा आफ्नो वरपरको वातावरण सरसफाइमा ध्यान दिन र सुरक्षित तरिकाले घरमै बसेर केही समयलाई सामाजिक दूरी कायम गर्न पनि तरुण दलले आग्रह गरेको छ ।