५ भदौ, काठमाडौं । आफू ‘डन’ भएको बताउँदै फोनबाट धम्की दिएर रकम माग गर्ने एक युवालाई प्रहरीले काठमाडौं धापासीबाट बिहीबार पक्राउ गरेको छ ।
अमित डनको नाममा फोन गरेर एक हप्ता भित्र १५ लाख रुपैयाँ माग्दै धम्की दिएको अभियोगमा महानगरीय अपराध अनुसन्धान महाशाखाको टोलीले धापासी-९ बस्ने १८ वर्षीय आशिष पाण्डेलाई पक्राउ गरेको हो ।
पाण्डेले न्यूरोडका एक कम्यूटर व्यापारीलाई एक पटक फोन गरेर घाँटी छिनाइदिने धम्की दिँदै १५ लाख रुपैयाँ माग गरेका थिए । महानगरी अपराध अनुसन्धान महाशाखाका एसपी भुपाल कुमार भण्डारीका अनुसार पाण्डेले अर्काको मोवाइल सिम दुरुपयोग गरेर ब्यापारीलाई धम्की दिएको खुलेको छ ।
प्रहरी अनुसन्धानका क्रममा पाण्डेले ती व्यापारीलाई एक पटक मात्रै फोन गरेर धम्की दिएको पत्ता लागेको हो । ‘अहिलेसम्मको अनुसन्धानमा उनी अन्य अपराधिक घटनामा संलग्न भएको पाइएको छैन’, एसपी भण्डारीले भने, ‘थप अनुसन्धानबाट अन्य अपराध पुष्ट नभए सार्वजनिक अपराधमा मुद्दा चलाउँछौं ।’
