२६ साउन, काठमाडौं । नेकपा एमालेका उपमहासचिव विष्णु पौडेलले भदौ तेस्रो साताभित्र केपी शर्मा ओलीको नेतृत्वमा राष्ट्रिय सहमतिको सरकार बनिसक्ने दावी गरेका छन् ।
ढिला भए पनि भदौको दोस्रो साताभित्र संविधान जारी हुने र तेस्रो साता नयाँ सरकार बन्ने उनले बताए ।
रिपोर्टर्स क्लब नेपालले मंगलबार आयोजना गरेको साक्षात्कारमा पौडेलले भने-‘सरकार निर्माणको विषयमा दलहरुवीच सहमति बनिसकेको छ । एमाले अध्यक्ष केपी शर्मा ओलीले नेतृत्व गर्ने विषयमा कुनै कन्फ्यूजन छैन ।’
सरकारमा सबै दललाई सहभागी गराएर राष्ट्रिय स्वरुप दिन एमाले हदैसम्म लचिलो हुने उनले बताए ।
सीमांकनसहितको परिमार्जित मस्यौदा आएपछि विरोध हुनु स्वभाविक भएपनि अपि्रय घटना हुनु दुःखद भएको भन्दै पौडेलले जनताको सुझावलाई मनन गरेर उचितता र आवश्यकता हेरेर निर्णय लिइने बताए । यद्यपि उनले ६ प्रदेशमा भने तलमाथि नहुने स्पष्ट पारे ।
उनले भने-‘संविधानसभा लोकतन्त्रको अभ्यास गर्ने सर्वोच्च थलो हो । भोलिसम्म छलफल सकेर मस्यौदा समितिमा जान्छ । त्यहाँ पनि जनताको सुझावलाई ध्यान दिन्छौ र सकेसम्म सुझावलाई समेट्छौं ।’
