इटाली । ‘बनौ आत्म निर्भर, नपरौँ दलालको भर’ भन्ने मुल नाराका साथ एन आर एन इटालीको ५ औँ साधारण सभा सम्पन्न भएको छ । इटालीको एतिहासिक सुन्दर शहर पिसामा भएको उक्त कार्यक्रममा इटालीमा बस्ने नेपालीहरुको उपस्थिति रहेको थियो ।
एन आर एन इटालीका अध्यक्ष सञ्जय देव श्रेष्ठको संयोजकत्वमा भएको उक्त कार्यक्रममा प्रमुख अतिथिको रुपमा एन आर एन युरोप संयोजक अर्जुनकुमार श्रेष्ठ, बिशेष अतिथिको रुपमा अवैतनिय वाणिज्यदूत पाउलो नुगारीको उपस्थित रहेको थियो । कार्यक्रममा एन आर एन इटालीले बिगत स्थापनाकालदेखि हाल सम्म गरेका गतिबिधीहरुको साथै भावी दिनमा गर्ने योजनाको बारेमा जानकारी गराइएको थियो ।
पछिल्लो समयमा दलालको भरमा परी नेपालीहरु ठगिएको र यसको न्युनिकरण कसरी गर्न सकिन्छ भन्ने बिषयमा एन आर एन इटालीले गम्भिरता साथ लिएको अध्यक्ष सञ्जय देव श्रेष्ठले बताउनु भएको छ । इटाली र नेपालको सम्बन्धलाई कसरी अझ नजिक बनाउन सकिन्छ भन्ने बिषयमा पनि एन आर एन इटालीले पहल गरिरहेको जानकारी दिइएको थियो । यसको लागि एप्लाइड स्कोलास्टिकका अध्यक्ष रोक्को लानाता इटालियन दम्पतीसँगको सहकार्यमा नेपालमा शिक्षाको क्षेत्रमा गर्ने काम अगाडि बढीरहेको जानकारी दिनुभएको छ ।
साथै यही सेप्टेम्बर १३ र १४ मा कमुने दि कान्तु , इटालीमा हुने कार्यक्रममा एन आर एन इटालीको तर्फबाट पनि नेपाली हस्त कलाका सामानहरु प्रर्दशन गरिने र नेपाली लोक नृत्य देखाउने र यस्ता गतिबिधीबाट आउने आर्थिक सङ्कलनलाई एन आर एन इटालीको राहत कोषमा जम्मा गर्ने जानकारी दिनु भयो । कुनै पनि समयमा आइपर्ने आपतकालिन अवस्थालाई ध्यानमा राखेर एन आर एन इटालीले हालै ११ सदस्यीय राहत कोष खडा गरेको छ ।
साथै इटालीमा रहदा आइपरेका कागजी समस्यालाई सुल्झाउन सहयोग गरेका कारण अवैतनिय वाणिज्यदूत पाउलो नुगारिको सबैले मुक्तकण्ठले प्रसङ्सा गरेका थिए । कार्यक्रममा मितेरी मन्च मिलानो, भारेजे समाज, रोमा समाज, भेनिस समाज र पिसा समाजका प्रतिनिधिहरुको उपस्थिति रहेको थियो ।
