नेपाल-भारत सीमामा अब निःशस्त्र एसएसबी

सुनौली नाकामा एसएसबीको पारस्परिक व्यवहारिक दलका जवानसँग हात मिलाउँदै डिआइजी प्रताप सिंह चुडावत

सलमान खान, रुपन्देही/आरपी सुवेदी, नेपालगञ्ज

२६ माघ, भैरहवा । नेपाल-भारत सिमा सुरक्षाको लागि बन्दुकसहित खटिने भारतीय सीमा सुरक्षाबल (एसएसबी)का जवानहरु अब निःशस्त्र खटिने भएका छन् ।

सीमानाकाबाट आवत जावत गर्नेहरुलाई बन्दुक सहित खटिएका सुरक्षाबलले सोधपुछ गर्दा नकारात्मक असर परेको भन्दै सोमबारदेखि निःशस्त्र परिचालन गर्न सुरु गरिएको हो ।

नेपाल-भारत सिमानाका सुनौलीमा सोमबार आयोजित एक कार्यक्रममा भारत गोरखपुरका डिआइजी प्रताप सिंह चुडावतका अनुसार अबदेखि एसएसबीका जवानहरु सादा पोशाकमा निःशस्त्र खटिने छन् र एसएसबीको हरियो रंगको ज्याकेट लगाउनेछन् ।

यसरी परिचालित एसएसबीलाई ‘पारस्परिक व्यवहारिक दल’ नाम दिइएको छ । यीनीहरुलाई परीक्षणको रुपमा हाल सुनौली र रुपैडिहा नाकामा खटाइएको छ । यो प्रयोग सफल भए नेपाल-भारतका अन्य सिमानाकामा पनि परिचालन गर्ने योजना छ ।

हाल सव-ईन्सपेक्टरको कमाण्डमा १ हवल्दार, ३ प्रहरी जवान र १ महिला प्रहरीलाई सीमामा खटाइएको छ ।

रुपैडिहामा सोमबार सुरुवात गर्दै भारतीय सशस्त्र सीमा बल (एसएसबी) सेक्टर लखिमपुर खीरीका उप-महानिरिक्षक डिआईजी उपेन्द्रकुमार बलोदीले दुबै देशका जनताको मन जितेर काम गर्ने बताए ।