एक वर्षमै भित्रियो ५० अर्बको गाडी र पार्टपुर्जा

६ भदौ, काठमाडौं । मुलुकमा एक वर्षभित्र ५० अर्ब बढीको गाडी तथा पार्टपुर्जा आयात गरिएको छ । सवारी साधन अत्यावश्यक बनेसँगै यसको आयात उच्च दरले बढिरहेको छ ।

आर्थिक वर्ष २०७१/०७२ मा ५० अर्ब २२ करोड रुपैयाँ बराबरको गाडी तथा पार्टपुर्जा नेपाल भित्रिएका छन् । जुन अघिल्लो वर्षको तुलनामा ११ अर्ब रुपैयाँले बढी हो ।

नेपाल राष्ट्र बैंकको तथ्यांकअनुसार अघिल्लो आव २०७०/०७१ मा ३९ अर्ब १४ करोड रुपैयाँ बराबरको गाडी तथा पार्टपुर्जा भित्रिएका थिए ।

पछिल्ला तीन वर्षमा गाडीको आयात १०/११ अर्बका दरले बढिरहेको छ । आव २०६९/०७० मा २९ अर्ब ९६ करोड रुपैयाँ बराबरको गाडी तथा पार्टपुर्जा आयात गरिएको थियो । यसले गाडीको आयात उच्च दरले बढिरहेको स्पष्ट देखाउँछ ।

गाडी तथा पार्टपुर्जाको आयात

देशहरु	२०६९/०७०	२०७०/०७१	२०७१/०७२
भारत	२६२९७.६	३२९८३.१	४४१२६.३
चीन	७९५.८	११९३.५	१३२२.४
अन्य मुलुक	२८६८.९	४९६६.९	४७७२.३
जम्मा	२९९६२.३	३९१४३.५	५०२२०.९

नेपालमा सबैभन्दा बढी गाडीहरु भारतबाट भित्रिन्छन् भने चीन दोस्रो नम्बरमा पर्छ । यहाँ कोरिया, जापान, थाइल्यान्ड तथा युरोपियन मुलुकहरुबाट सवारी आयात गरिँदै आएको छ ।

गत आवमा भारतबाट मात्र ४४ अर्ब १२ करोड रुपैयाँ बराबरको गाडी तथा पार्टपुर्जा आयात भएको छ । चीनबाट १ अर्ब ३२ करोड रुपैयाँको गाडी पार्टपुर्जा आयात गरिएको छ भने अन्य मुलुकबाट ४ अर्ब ७७ करोड रुपैयाँको गाडीहरु आयात भएको छ ।

होन्डा, किया, ल्यान्डरोवर, मर्सिडिज, टायोटा, भक्सवागन लगायतका महंगा गाडीहरु तेस्रो मुलुकबाट नेपाल भित्रिने गरेका छन् । इन्ट्री तथा मध्यमस्तरका कार, जीप र कमर्शियल भेहिकलहरु भारतबाट भित्रिन्छन् ।