कुबेतका नेपाली चेलीले पनि तीज मनाए  

नबराज पन्थी

कुबेत । कुवेतमा रहेका नेपाली चेलीहरूले नेपाली महिलाहरुको महान चाड हरितालिका तीज नाचगान र रमाइलो गरी मनाएका छन् ।

कुबेतको पुरानो सांस्कृतिक संस्था नेपाल कुबेत सास्कृतिक मञ्चको आयोजनामा कार्यक्रम गरी तीज मनाएका हुन् । नेपालमा जस्तै गरी नेपाली चेलीहरूले धक फुकाएर तीज गीत गाएर छमछमी नाँचे ।

मजदुरहरूको विदाको समय मिलाएर ऋषी पंचमीको दिन तीज मनाईएको थियो । कार्यक्रमको नेपाली दुताबास कुबेतका राजदुत यज्ञबहादुर हमालकी धर्मपत्नी रिता हमालले गरेकी थिइन् । कार्यक्रममा एनआर एनए कुबेतका अध्यक्ष अर्जुन तामाङ्ग, आईसी कोडिनेटर सुजन केसी पत्रकार हरिकृष्ण न्यौपाने, तोया दाहाल, इन्द्र भुषाल, इस्टमान वाइवा, अप्सरा आचार्य, तारा पौडेल टिकाराम आचार्य लगायतले शुभकामना दिए ।

सांस्कृतिक मन्चका अध्यक्ष माधव शर्माको अध्यक्षता, सागर खड्काको संचालनमा सम्पन्न कार्यक्रममा उपस्थित सबै महिलाहरू कम्मर मर्काइ मर्काइ नाचेका थिए ।  भर्खरै रोजगारीको शिलशिलामा कुबेत आएकी लोक गायिका इन्दिरा शाह तथा स्थानीय लोकगायक माधव शर्मा, कृष्ण सुनार, सीमा घिमिरे नेहा राई लगायतले महिलाहरूलार्इ साथ दिएका थिए ।

एनआरएनए कुबेतले संचालन गरेको राहत कोष संकलन अभियानमा कार्यक्रम स्थलमा जम्मा भएको रकम सांस्कृतिक मंचका अध्यक्ष माधव शर्माले एनआरएनए कुबेतकी एक मात्र महिला प्रतिनिधि मधु मगरलाई हस्तान्तरण गरेका थिए।