१२ कात्तिक, काठमाडौं । नेपाल सरकारको स्वामित्वमा रहेको जलविद्युत लगानी तथा विकास कम्पनी (एचआइडिसीएल)ले १ अर्ब ९० करोड रुपैयाँ बराबरका साधारण सेयरका लागि अाजदेखि अावेदन खुल्ला गरेको छ ।
एचआइडिसीएलको सेयरमा सर्वसाधारण लगानीकर्ताले कात्तिक २९ गतेसम्म आबेदन दिन सक्नेछन् । तर, मागभन्दा बढी अावेदन परेको खण्डमा भने कात्तिक १९ गते आबेदन लिन बन्द गर्ने कम्पनीले जनाएको छ ।
यसअघि कात्तिक १६ गते नै अावेदन बन्द गर्न सक्ने जनाएको थियो । तर बुधबार विज्ञप्ती जारी गरी कात्तिक १९ गतेसम्मका लागि समय थप गरेको कम्पनीले जनाएको छ ।
कम्पनीले सेयर निष्काशन तथा बिक्री प्रबन्धकको जिम्मेवारी नागरिक लगानी कोषलाई दिएको छ । एनएमबी क्यापिटल र एनसीएम मर्चेण्ट बैंकिंगभने सहायक बिक्री प्रबन्धक छन् । कम्पनीले सामुहिक लगानी कोषहरुका लागि यसअघि नै १० लाख कित्ता बाँडफाँट गरिसकेको छ ।
प्रतिकित्ता सय रुपैंयाका दरले न्युनतम ५० कित्ता अर्थात् ५ हजार रुपैंयादेखि अधिकतम ५० लाख कित्ता अर्थात ५० करोड रुपैंयासम्मका लागि आवेदन दिन सकिने बिक्री प्रबन्धक नागरिक लगानी कोषले जनाएको छ । लगानी कोषका कार्यालयलगायत २० वटा कम्पनीका कार्यालयहरुमा आबेदन फारम लिएर आइपिओ भर्न सकिनेछ ।
यो कम्पनीको सेयर जलविद्युत क्षेत्रको हालसम्मकै ठूलो हो । इक्रा नेपालले जलविद्युत यो कम्पनीको शेयरलाई ग्रेड ३ रेटिंग दिएको छ । नियामक धितोपत्र बोर्डले भदौ २८ गते कम्पनीलाई साधारण शेयर निष्काशनको अनुमती दिएको थियो ।
जलविद्युत आयोजनाहरुमा लगानी गर्ने उद्देश्यले २०६८ साउनमा स्थापना भएको कम्पनीको अधिकृत पुँजी ५० अर्ब, चुक्ता पुँजी ८ अर्ब रुपैयाँ रहेको छ । कम्पनीले कुल पुँजीको २५ प्रतिशत सर्वसाधारणमा सेयर जारी गरि उठाउन लागेको हो । कम्पनीले २० देखि ८२ मेगावाटसम्मका गरी २ सय ७१ मेगावाट बराबरका विभिन्न ८ वटा जलविद्युत आयोजनाहरुमा ४३ अर्ब रुपैयाँ लगानी गरिसकेको छ ।
