१ वैशाख, काठमाडौं । नयाँ शक्ति नेपालका संयोजक डा. बाबुराम भट्टराईले द्वन्द्व पीडितको समस्यालाई ठीक ढंगबाट समाधान नभए अर्को द्वन्द्व सुरु हुने चेतावनी दिएका छन् ।
अदालतको भूमिका शान्ति प्रक्रियासम्मत हुनुपर्नेमा अपेक्षाकृत सकारात्मक नहुँदा यसले झन जटिलता थप्ने काम गरेको उनले बताए ।
नयाँ शक्ति नेपालले बुधबार आयोजना गरेको संक्रमणकालीन न्यायसम्बन्धी अन्तरक्रिया कार्यक्रममा डा. भट्टराईले द्वन्द्वपीडितको समस्या सबैको साझा समस्या भएकाले गम्भीरतापूर्वक लिनुपर्नेमा जोड दिए ।
‘म प्रधानमन्त्री भएको बेला तत्काल राहत दिने निर्णय गरेको थिएँ, तर अन्य राजनीतिक दलहरु, केही गैरसरकारी संस्था र अदालतले समेत उक्त निर्णय कार्यान्वयन गर्न दिएनन्,’ डा. भट्टराईले भने, ‘यसअघि भएका सबै सम्झौताहरु पालना गरिनुपर्दछ । नत्र झन् जटिलता थपिने छ ।’
बेपत्ता तथा द्वन्द्वपीडितको समस्याप्रति राजनीतिक दलहरु उदासीन रहेको आरोपसमेत उनले लगाए । माओवादी पार्टीहरु झन् बढी उदासिन भएको उनले बताए । ‘झन् बढी जिम्मेवार हुनुपर्ने माओवादी धाराहरु विभाजनका कारण झन् बढी उदासीन देखिएका छन्,’ डा. भट्टराइले भने ।
