काठमाडौं । पाँचसय बढी गीतमा स्वर दिएकी छिन् मिलन अमात्यले । उनका गीतमा यो चर्चित नायिका एवं मोडलले कम्मर मर्काइ मर्काइ नाँचेका छन् । आफ्ना धेरै गीतमा अरुले नाँचेको हेरेरै चित्त बुझाएकी मिलन यसपाली भने आफै छमछमी नाँचिन् ।
गोपाल दाहालको शब्द, राजनराज शिवाकोटीको संगीत रहेको ‘विश्व सुन्दरी…’ बोलको गीतमा मिलनले स्वर दिनुको साथै अभिनय पनि आफैं गरिन् ।
मनमनै अभिनय गर्ने पाए भन्ने सोच आएपनि आफ्नो गीतमा मोडलिङ गर्छु नै भन्ने थिएन उनलाई । गीत रकेडिङ सक्ने बित्तिकै संगीतकार राजनराजले भने ‘मिलन यो गीतमा तिमी आफैं मोडलिङ गर । राम्रो गर्न सक्छ्यौ ।’
कोरियोग्राफर गम्भिर विष्टले पनि त्यही सल्लाह दिए ‘तपाई नाँच्नुस् राम्रो हुन्छ ।’ दुई सहकर्मीले यसो भनेपछि ऐना हेरिन् मिलन भन्छिन् । ऐनामा आफुलाई मोटी देखेपछि वेट घटाउन तीर लागिन् ।
उनले अभिनय गर्ने कुरो चल्दा उनको वजन ६८ किलो थियो । भिडियो सुटिङ गर्ने वेलामा ५८ किलोमा झारीन आफुलाई । १० किलो कसरि घट्यो ? सहज उत्तर दिईन् ‘बिहान बिहान जगिङ, खानामा माछा मासु बन्द, अरु पनि हल्का कन्ट्रोल ।’
आँखामा गाजल लाकी छु
ओठमा लाली लाकी छु…भन्दै छमछमी नाचेकी मिलनको नृत्य शैलि ब्यबसायिक मोडलको भन्दा कम छैन । मिलन भन्छिन् ‘दश दिन जति क्लास पनि लिएकी छु ।’
खासमा उनी नाँच्नमा निकै सिपालु थिईन् । पाँच कक्षा पढ्दासम्म स्कुलमा हुने हरेक कार्यक्रममा नाचेरै अवार्ड पाउथिन्, जब गायनमा सक्रिय हुन थालिन् । नाँच्ने काम ठप्पै बन्द भयो । मिलन भन्छिन् ‘गायनमा ब्यस्त भएपछि नाँच्न छाडेँ ।’
अहिले उनको यो भिडियो धेरैका लागि सरप्राईज भएको छ । ‘कति राम्रो नाँचेकी ?’ उनका शुभचिन्तकहरुले यहि प्रश्न गर्ने गरेका छन् । विशाल भण्डारीको निर्देशन रहेको भिडियोलाई आम दर्शकले निकै मन पराएका छन् ।
तेस्रो एलबम ‘मिलन यात्रा’ को तयारीमा रहेकि मिलनलाई फिल्मप्रति भने रुची छैन । तर, संगीतमा आफ्नो रफ्तार कायमै राख्ने योजनामा छिन् । चलचित्र र आधुनिक गायनमा सक्रिय मिलनको ‘के म तिम्रो होइन र’ को गीत अहिले चर्चामा छ ।
