१८ जेठ, काठमाडौं । संयुक्त लोकतान्त्रिक मधेसी मोर्चाले मधेस समस्या समाधान गर्न सरकार गम्भीर नभएको हस्तक्षेप गर्न संसदलाई अपील गरेको छ ।
व्यवस्थापिका संसदको मंगलबारको बैठक सुरु हुनासाथ मोर्चामा आवद्ध दलहरुका सांसदहरुले उठेर विरोध गरे । लगतै सभामुख ओनसरी घर्ती मगरले सदभावनाका सांसद नरसिंह चौधरीलाई बोल्न समय दिइन् ।
संविधान निर्माणको बेलादेखि नै आफूहरु आन्दोलनमा रहेको र पछिल्लो पटक मधेसी मोर्चाले मात्र होइन, मगर, तमुनाव, लिम्बुवान सबैले सिंहदरवार घेरेर आफ्नो कुरा राखेको उनले बताए । तर, सरकार जिम्मेवार ढंगले प्रस्तुत नभएको र निद्रामग्न रहेको उनले बताए ।
सबै मोर्चामा असफल भएको भन्दै सांसद चौधरीले समस्या समाधानका लागि हस्तक्षेप गर्न संसदलाई अपील गरे । उनले भने, ‘म सभामुखसँग निवेदन गर्न चाहन्छु कि सदनले हस्तक्षेप गरोस् र समस्या समाधान गर्न सरकारलाई निर्देशन दिओस् ।’
उनले आफूहरुको माग सम्बोधन नभएसम्म संसद बहिस्कार गर्ने बताए । लगतै मधेसी मोर्चा र संघीय गठवन्धनमा आवद्ध दलका सांसदहरु बैठकबाट बाहिरिए ।
