अज्ञात रोगका कारण विद्यार्थी बेहोस हुन थालेपछि समस्या

८ असार, झापा । झापाको कन्काई नगरपालिका-४, सुरुङ्गामा रहेको मेरिगोल्ड अङ्ग्रेजी माध्यमिक विद्यालयका विद्यार्थीहरु अज्ञात रोगका कारण दिनहुँ बेहोस हुन थालेपछि पठनपाठनमा समस्या भएको छ ।

विद्यालयका प्रधानाध्यापक गोकुुल उप्रेतीका अनुसार आइतबार कक्षा ७ मा पढ्ने ७ जना छात्र एकै पटक बेहोस भएका थिए । त्यस्तै, बेहोस हुने क्रम सोमबार पनि दोहोरिएको उनले जानकारी दिए ।

नियमित पठनपाठन भइरहेको समयमा विद्यार्थी बेहोस भएपछि उनीहरुलाई स्थानीय हस्पिटलमा लगेर उपचार गरिएको थियो । मेरिगोल्ड हस्पिटल, सुरुङ्गाका डाक्टरहरुले पनि अनौठो रोगका कारण विद्यार्थीहरु विरामी भएको बताएपछि शिक्षक र अभिभावकहरु चिन्तित बनेको उप्रेतीको भनाई छ ।

यसरी कक्षा ७ का विद्यार्थी दिनहुँ बेहोस हुन थालेपछि दुई दिनका लागि पठनपाठन बन्द गरिएको विद्यालयले जनाएको छ ।