२ साउन, बुटवल । बुटवलको कालिकानगरमा हिँडिरहेकी एक महिलाले घाँटीमा लगाएको सुनको सिक्री लुट्ने युवक पक्राउ परेका छन् । पक्राउ पर्नेमा मोरङको पथरी-१ का १७ वर्षीय सनम मगर छन् ।
नवलपरासीको भुमइस्थित माइतीबाट बुटवलको कालिकानगर सन्तोषीपथमा रहेको घरमा फर्किँदै गरेकी २५ वर्षीया शोभा न्यौपानेको घाँटीबाट मगरले २ तोलाको सुनको सिक्री चुडालेका थिए । उनले चुडालेको सिक्री भने लैजान पाएनन् । सिक्री लिएर भागेका मगरलाई झाडीमा लुकेको देखेपछि स्थानीयले समातेर प्रहरीलाई बुझाएका हुन् ।
बुटवलको राजमार्ग चौराहाबाट हिँड्दै घर जाँदै गरेकी शोभाले काखमा आफ्नो सानो नानी पनि बोकेकी थिइन् ।
चौराहाबाटै पिछा गरेका मगरले उनलाई जागरण एफएम अगाडि पुग्दा घाँटीको सिक्री लुटेका थिए । मगरले आफूसँग पैसा नभएकाले सिक्री चुडाएको बताएका थिए ।
मोरङबाट हिँजोमात्र बुटवल आएको बताउने मगर अहिले प्रहरी हिरासतमा छन् ।
