५ साउन, काठमाडौं । नेकपा माओवादी केन्द्रले संसदमा दर्ता भएको अविश्वास प्रस्तावको पक्षमा मतदान गर्न आफ्ना सांसदहरुलाई ह्वीप जारी गरेको छ ।
प्रधानमन्त्री केपी ओली नेतृत्वको वर्तमान सरकारविरुद्ध माओवादी र कांग्रेस मिलेर अविश्वासको प्रस्ताव दर्ता गराएका छन् । अविश्वासको प्रस्तावमाथि बिहीबार संसदमा छलफल सुरु हुँदैछ ।
बुधबार बसेको माओवादी संसदीय दलको बैठकले अविश्वासको प्रस्तावको पक्षमा उँभिन सांसदहरुलाई निर्देशन दिएको हो । बिहीबारको संसद बैठकमा अनिवार्य उपस्थित हुन पनि माओवादीले आफ्ना सांसदहरुलाई निर्देशन दिएको छ ।
बैठकले अविश्वासको प्रस्तावको पक्षमा मतदान गर्नका लागि संसदमा रहेका अन्य दललाई समेत आह्वान गर्ने निर्णय गरेको प्रमुख सचेतक हितराज पाण्डेले जानकारी दिए ।
