२७ साउन, काठमाडौं । भारत सरकारले सुत्केरी महिलालाई ६ महिनाको विदा दिने निर्णय गरेको छ । केन्द्रीय मन्त्रीमण्डलले तीन महिनाको सुत्केरी विदालाई बढाएर ६ महिना पुर्याएको हो ।
आफैले बच्चा नजन्माएका तर अरुको बच्चा अपनाएकाहरुलाई पनि मोदी सरकारले ६ महिनाको सुत्केरी विदा दिने निर्णय गरेको भारतीय सञ्चार माध्यमहरुले जनाएका छन् ।
सरकारी जागिर खाइरहेका महिलाहरुले सुत्केरी विदाको अवधिमा पनि सबै तलब सुविधा पाउनेछन् ।
सरकारी रेडियो स्टेशन अल इण्डिया रेडियोका अनुसार ६ महिनाको सुत्केरी विदा दुई बच्चा जन्माउँदासम्म पाउने छन् । यदी तेस्रो वा सोभन्दा बढी बच्चा जन्माउनेहरुले भने १२ हप्तासम्म मात्रै विदा पाउनेछन् ।
यो नियम १० वा सोभन्दा बढी कर्मचारी कार्यरत सबै कार्यालयहरुमा लागू हुनेछ ।
सुत्केरी विदा बढाउने मन्त्रिपरिषद निर्णयलाई संसदबाट पारित गराउने कोशिश भइरहेको छ ।
