८ भदौ, काठमाडौं । नेपाली कांग्रेसमा रामचन्द्र पौडेल समूहले अझै मन्त्रीहरुको नाम सिफारिस गरेको छैन ।
कांग्रेसले आफ्नो भागमा परेका मन्त्रालयहरुमा मन्त्री सिफारिस गर्ने तयारी गरेको छ । तर, आन्तरिक भागवण्डा नमिलेका कारण मन्त्रीहरुको टुंगो लागिसकेको छैन ।
मन्त्री छान्नका लागि पौडेल समूहको बुधबार बिहान बैठक बसेको थियो । तर, नेता पौडेलले आफूहरुले पाउने मन्त्रालय र संख्या अझै टुंगो नलागेको नेताहरुलाई जानकारी दिए ।
पौडेलले बताएअनुसार सभापति देउवाले चार मन्त्रीको नाम सिफारिस गर्न भनेका छन् । तर, आफूले कम्तिमा ५/६ मन्त्रालय आफ्नो समूहले पाउनुपर्ने अडान लिएको उनले बताए ।
बैठकमा सहभागी एक नेताले भने, अब उहाँ (पौडेल)ले सभापतिजीसँग छलफल गर्नुहुन्छ । र, ४ बजे हाम्रो बैठक बोलाइएको छ ।’
मन्त्रालय नटुंगिएको भन्दै बैठकमा नामबारे छलफल भएको छैन । तर, नेताहरुबीच समझदारी भइरहेको बताइएको छ ।
